საქართველოში რუსოფობიური განწყობები არ არსებობს, არის პოლიტიკური დაძაბულობა და სხვანაირად როგორ იქნება, როცა ჩვენი ტერიტორიები ოკუპირებულია, – განაცხადა საქართველოს პრეზიდენტმა, სალომე ზურაბიშვილმა რუსეთის საგარეო საქმეთა მინისტრის, სერგეი ლავროვის განცხადების კომენტირებისას.
„რუსოფობიური განწყობები არ არსებობს საქართველოში, არასოდეს არ არსებობდა და ეს იყო ერთ-ერთი ჩემი თემა აქ, სადაც გამოვდივარ, რომ მსოფლიოს ვუთხრათ, მთავარი, რაც შეიძლება ჩვენ შეიძლება მოვუტანოთ მსოფლიოს, ეს არის ჩვენი შემწყნარებლობა, ტოლერანტობა. არავის მიმართ ჩვენ არ ვართ ფობი და არასოდეს ვყოფილვართ.
სხვათა შორის, ამის მაგალითი არის, რომ 1 500 000 რუსი ტურისტი ჩამოვიდა შარშან და არც ერთი ინციდენტი არ არსებობს. დანარჩენი არის პოლიტიკური დაძაბულობა, რომელიც აშკარად არსებობს ორ ქვეყანას შორის და როგორ იქნება სხვანაირად, როცა შენი ტერიტორია ოკუპირებული არის და ამაზე საჭიროა მუშაობა. ამაზე უნდა ვიმუშაოთ, ოღონდ არა მარტო, ჩვენ გვერდით და ვენ ზურგსუკან დგანან ჩვენი პარტნიორები და ამ კუთხით, შეგვიძლია, წინ წავიდეთ“, – განაცხადა სალომე ზურაბიშვილმა.
რუსული საინფორმაციო სააგენტოების ცნობით, რუსეთის საგარეო საქმეთა მინისტრმა, სერგეი ლავროვმა გაერო-ში, ბრიფინგზე განაცხადა: „ჩვენ არასოდეს გვიძებნია ხელოვნური მიზეზები საქართველოსთან საჩხუბრად და თუკი საქართველოს ხელისუფლება შეძლებს, პასუხისმგებლობით განავითაროს საკუთარი პოზიცია რუსეთთან ნორმალური ურთიერთობების სასარგებლოდ და არ გაიხედავს რუსოფობებისკენ… პირადად, მე საჰაერო კომუნიკაციას აღვადგენდი“.