35 წლის მამაკაცის მკვლელობის შესახებ “რეგიონული კვირისთვის” ახალი დეტალები ხდება ცნობილი.
როგორც ირკვევა დაღუპულ დავით მუმლაძეს ცივი იარაღით 30- ზე მეტი ჭრილობა აქვს მიყენებული.
საგულისხმოა ის ფაქტიც, რომ ცხედრის დაკრძალვა გუშინ უნდა მომხდარიყო, თუმცა ოჯახის წევრების თქმით , გარკვეული მიზეზების გამო დაკრძალვა ხვალისთვის გადაიდო.
დაღუპული საქართველოს მოქალაქის ორი პასპორტით, ორი სხვადასხვა სახელით და გვარით სარგებლობდა და ბოლო წლების განმავლობაში საზღვარგარეთ ცხოვრობდა.
როგორც ოჯახის ერთ-ერთმა ახლობელმა განაცხადა, დეპორტაციის გამო, ორი კვირის წინ, ის საქართველოში დაბრუნდა და სახლიდან გარეთ გასვლას ერიდებოდა.
მუმლაძეების ოჯახი 5 წელია რაც ხაშურიდან სურამში გადავიდა საცხოვრებლად. მეზობლების თქმით, ისინი ოჯახს თითქმის არ იცნობენ და არც მათი წარსულის შესახებ იციან.
როგორც ამბობენ, დაღუპულს ერთ-ერთ ეჭვმიტანილთან ნათესაური ურთიერთობა აკავშირებდა.
ცნობისთვის, შინაგან საქმეთა სამინისტროს ქვემო ქართლის პოლიციის დეპარტამენტის და თბილისის პოლიციის დეპარტამენტის გლდანი-ნაძალადევის სამმართველოს თანამშრომლებმა, ერთობლივად ჩატარებული ინტენსიური ოპერატიულ-საგამოძიებო ღონისძიებების შედეგად, რუსთავში მომხდარი 35 წლის მამაკაცის მკვლელობის ფაქტი ცხელ კვალზე გახსნეს.
მომხდართან დაკავშირებით ჩატარებული ინტენსიური ოპერატიულ-საგამოძიებო ღონისძიებების შედეგად, უკვე დაკავებულია 5 პირი, ხოლო განზრახ მკვლელობაში მონაწილე, წარსულში მრავალჯერ ნასამართლევი 1983 წელს დაბადებული ზ.ჯ.-ს დაკავების მიზნით ტარდება აქტიური ოპერატიულ-სამძებრო ღონისძიებები,” – ნათქვამია შსს-ს ინფორმაციაში.
დამამძიმებელ გარემოებებში ჩადენილი განზრახ მკვლელობის, ჯგუფურად ჩადენილი თავისუფლების უკანონოდ აღკვეთის და ცრუ ჩვენების მიცემის ფაქტებზე გამოძიება სსკ-ის 109-ე, 143-ე და 370-ე მუხლებით მიმდინარეობს.