საქართველოს კათოლიკოს-პატრიარქმა ილია მეორემ მეტეხის ხიდზე ასი ათასი მოწამის ხსენების დღესთან დაკავშირებით პარაკლისი გადაიხადა. პატრიარქმა შეკრებილებს მიმართა სიტყვებით: „საქართველო, მიყვარხარ“, რაზეც დამსწრეებმა უპასუხეს შეძახილით: „გვიყვარხარ“.
მანამდე, ანჩისხატის სახელობის ეკლესიიდან მეტეხის ხიდამდე სტუდენტებმა მსვლელობა გამართე. მორწმუნეებმა ხიდიდან მტკვარში ყვავილები ჩაუშვეს.
საქართველოს მართლმადიდებელი ეკლესია ასი ათასი მოწამის ხსენების დღეს ყოველწლიურად 13 ნოემბერს აღნიშნავს. გადმოცემის თანახმად, 1227 წელს ჯალალედინის ბრძანებით მეტეხის ხიდზე ასი ათას ქართველს ყოვლადწმინდა ღვთისმშობლისა და უფლის ხატების შეურაცხყოფა და სარწმუნოების გამოცვლა მოსთხოვეს. უარის მიღების გამო, მათ თავები მოკვეთეს და მტკვარში ჩაყარეს.
კომენტარები