საქართველოში ევროკავშირის ელჩმა კარლ ჰარცელმა ექიმ ვაჟა გაფრინდაშვილის უკანონო პატიმრობის შესახებ განცხადება გააკეთა.
ელჩის თქმით, ევროკავშირი ჩართულია მოლაპარაკებებში, რომლებიც მიზნად ისახავს ექიმის სწრაფ გათავისუფლებას.
„ჩვენ ვეწინააღმდეგებით ექიმის უკანონო დაკავებას. ჩვენ მას განვიხილავთ, როგორც ადმინისტრაციული გამყოფი ხაზის გასწვრივ შექმნილი ძალიან დაძაბული და რთული სიტუაციის მსხვერპლს. ჩვენ ვაგრძელებთ გადასასვლელი პუნქტების გახსნისკენ მიმართულ ძალისხმევას, რაც ძალიან მნიშვნელოვანია, რადგან ეს ამ გამყოფი ხაზის გასწვრივ ჰუმანიტარულ და პოლიტიკურ სიტუაციაზე მნიშვნელოვნად აისახება“, – განაცხადა ჰარცელმა.
20 ნოემბერს ცნობილი გახდა, რომ ცხინვალის ციხეში ექიმს ადვოკატი ვლადიმირ ფიდაროვი შეხვდა.
15 ნოემბერს ვაჟა გაფრინდაშვილს ოკუპანტებმა ორთვიანი წინასწარი პატიმრობა შეუფარდეს. მას ე.წ. საზღვრის უკანონო გადაკვეთას ედავებიან. 16 ნოემბერს, აშშ-ის საელჩომ ვაჟა გაფრინდაშვილის დაუყოვნებლივ გათავისუფლება მოითხოვა. ამავე მიზნით აქციებს ქართველი ექიმებიც მართავენ.
სახელმწიფო მინისტრის, ქეთევან ციხელაშვილის განცხადებით, რამდენიმე არხით მიღებული ინფორმაციით, ექიმ ვაჟა გაფრინდაშვილს ცხინვალის საოკუპაციო რეჟიმი უახლოეს დღეებში გაათავისუფლებს. ე.წ. სამხრეთ ოსეთის „სახელმწიფო უშიშროების კომიტეტმა“ ექიმ ვაჟა გაფრინდაშვილის დაკავების შესახებ განცხადება გაავრცელა, რომელშიც ნათქვამია, რომ გაფრინდაშვილი 2008 წლის აგვისტოს მოვლენებში აქტიურად მონაწილეობდა.