„ნაცსექტანტებმა ძალიან კარგად იციან, რომ პროპორციული არჩევნები ვერ გაიმართება, რადგან საკონსტიტუციო ვადები გაშვებულია!“ – ამის შესახებ სოციალურ ქსელში ჟურნალისტი ბონდო მძინარაშვილი წერს და შემდეგი სახის პოსტს აქვეყნებს:
„ასევე ძალიან კარგად იციან, რომ ე.წ. გერმანული მოდელიც საკონსტიტუციო ცვლილებებს საჭიროებს და ვადები აქაც გაშვებულია!
მათ ყველაზე კარგად იციან, რომ საერთაშორისო თანამეგობრობა ამ ალიაქოთს არ თანაუგრძნობს და მხარდაჭერას ვერ მოიპოვებენ, – დასავლეთს საქართველოში სტაბილურობა სჭირდება, ძალაუფლებას მოწყურებული აფთრების გნიასი და ტურების კივილი კი მის ინტერესებს სერიოზულად აზიანებს!
მაშ, რა მიზანი აქვთ?
სინამდვილეში ნაცსექტის და მისი ყველაზე პათოლოგიური განაყოფის – ბოკერვილების მიზანი ძალიან მარტივია:
ამ რამდენიმე თვის განმავლობაში დაღალონ „ქართული ოცნება“, მოახდინონ სახელმწიფო სტრუქტურების დეზორგანიზაცია და გააღიზიანონ ხალხი.
რისთვის სჭირდებათ ეს ყველაფერი?
2020 წლის საპარლამენტო არჩევნებისთვის მმართველ პოლიტიკურ ძალას მორალურ უპირატესობას თუ ვერ წაართმევენ, მოარყევენ მაინც, რაც მათ აქტივში ჩაიწერება; „ქართული ოცნება“ არა მხოლოდ გაყალბებაზე ვერ იფიქრებს, არამედ, უპირატესობის შემთხვევაშიც კი გაუჭირდება მოპოვებული გამარჯვების ლეგიტიმაცია. ხალხის იმდროინდელი განწყობა კი სულაც არ იქნება ხელისუფლებისთვის სახარბიელო: ხალხს არ უყვარს შეშინებული პოლიტიკური ძალები და პოლიტიკოსები!
ნაცსექტის და მისი მანიაკალური განაყარის – ბოკერვილებისთვის სრულიად ნათელია, რომ 2020 წლის არჩევნებზე საბოლოოდ ჩაირეცხებიან და მათი ახლანდელი კონტრდემოკრატიული ქმედებები მხოლოდ წარსულით ნასაზრდოები პოლიტიკური სიძლიერის დამტკიცების უსუსური მცდელობაა.
ისინი ცდილობენ, არეულობების მოწყობის მუქარით და პოლიტიკური შანტაჟით აქედანვე დაიბევონ ხელისუფლებისგან, რომ 2020 წლის არჩევნების შემდეგაც გაუყოფენ ძალაუფლებას, რასაც ბიძინა ივანიშვილი არ ეთანხმება და არც დაუშვებს, რადგან მის 2020 წლის არჩევნების შემდგომ გეგმებში ნაცსექტის ამ სახით შენარჩუნება არ შედის – ივანიშვილი მარათონელია, შორს იყურება და კარგად იცის, რომ პოლიტიკური ველი ახალ სისხლს მოითხოვს, ნაცსექტა კი უკვე ხრწნის პროცესშია. ამიტომაც აყროლდა არჩევნებამდე ერთი წლით ადრე.
ამ ვითარებაში ბიძინა ივანიშვილს და „ქართულ ოცნებას“ არაფერი დარჩენიათ, გარდა იმისა, რომ მაქსიმალური თავშეკავებით გაანეიტრალონ ნაცსექტის პროვოკაციები. ამავდროულად, ხელისუფლების სხვადასხვა შტოში დასაქმებული „ოცნების“ წევრები და მომხრეები, ასევე გადაუწყვეტელი ამომრჩეველები უნდა დაამშვიდონ და უჩვენონ, რომ უძლეველობაში დარწმუნებულ და ამიტომაც თავდაჯერებულ და გაწონასწორებულ პოლიტიკურ ძალას წარმოადგენენ.
„ქართული ოცნება“ დილემის წინაშე დგას:
ან ბოლომდე უნდა გაანადგუროს პოლიტიკურ ძალად წოდებული მანიაკალურ-დესტრუქციული ძალა, რომელიც პოლიტიკურად აბსოლუტურად მიუღებელ დესტაბილიზაციაში ხედავს საკუთარი თავის გადარჩენას, ანდა შეეცადოს, ვითარება დროებით ჩააცხროს და ნაცსექტა რაღაც ფორმით შეინარჩუნოს, რაც ბუნებრივად გამოიწვევს „ოცნების“ გარდაუვალ კატასტროფას – „ოცნების“ მომხრეების სრული დემორალიზაციის ფონზე კიდევ უფრო გათავხედდებიან ნაცსექტანტები, მათ მიმართ ლოიალურთა რიცხვი კი მნიშვნელოვნად გაიზრდება.
ახლა არჩევანია გასაკეთებელი: ან ნაცსექტასთან და ხალხის წინააღმდეგ, ანდა – ხალხთან და ნაცსექტის წინააღმდეგ!
პრინციპში ეს არჩევანიც არ არის, ეს სიკვდილ-სიცოცხლის საკითხია „ქართული ოცნებისთვის“, რომელმაც აბსოლუტურად გაუმართლებელი კოჰაბიტაციით თვითონვე ჩაირთო წამმზომი!“ – წერსმძინარაშვილი.