ჟურნალისტი გია გაბრიჭიძე საქართველოში საგანგებო მდგომარეობის გამოცხადებას სოციალურ ქსელში ეხმაურება.
მისი თქმით, მთავრობის ეს გადაწყვეტილება არა მხოლოდ პანდემიისგან თავდაცვას შეუწყობს ხელს, არამედ ჯანდაცვის სფეროში თავდაუზოგავი მუშაობისთვის ხელის შემშლელ პირობებს მაქსიმალურად შეამცირებს.
„საგანგებო მდგომარეობის გამოცხადება საკმაოდ სწორი ნაბიჯი იყო არა მხოლოდ პანდემიისგან თავდაცვის მიზნით, არამედ პირველ რიგში ჯანდაცვის სფეროს თავდაუზოგავი მუშაობისთვის გარე ხელის შემშლელი პირობების მაქსიმალურად შემცირებისთვის და ეკონომიკური გუნდის სრული მობილიზებისთვის.
ჯანდაცვის სფეროს მუშაობის უმთავრესი ხელისშემშლელი პირობა იყო ის, რომ ჩვენი “მოქალაქეების” გარკვეული ნაწილი ყოვლად იდიოტური მოსაზრებებით არღვევდა თვითიზოლაციის წესს და საფრთხეს უქმნიდა გარემომცველ ადამიანებს. ასევე იმ ისტერიული ფონის შეწყვეტა, რასაც გარკვეული მედიასაშუალებები, თუ მოპოლიტიკოსო ტიპები ახორციელებდნენ.
რაც შეეხება ეკონომიკური გუნდის სრულ მობილიზებას, დარწმუნებული ვარ, რომ ეს ხალხი კარგად გაართმევს თავს იმ გამოწვევებს რაც არის და მაქსიმალურად მოემზადება პოსტპანდემიური მდგომარეობისთვის, რომელიც მგონია, რომ იოლი გადასატანი არ იქნება. ასევე მადა შეეკვეცებათ იმ უნამუსო ე.წ. ბიზნესმენებს, რომლებიც მაგ: 1.50 ლარიან თერმომეტრებს დღეს 5.50 ლარად ჰყიდიან და “ტეფალის უთოთი გაუთოვებული როჟებით” გვიწინასწარმეტყველებენ პროდუქტის გაძვირებას.
ბოლოს კი ცოტას გაგაღიმებთ: – საგანგებო მდგომარეობის ის პუნქტი, რომლის თანახმადაც 10 კაცზე მეტის შეკრება არ შეიძლება, ე.წ. ოპოზიციას არ ეხება. მათ თამამად შეუძლიათ ჩაატარონ თავიანთი “ხალხმრავალი” აქციები, რადგანაც 8-ზე მეტნი (თუ პოლიციას და ჟურნალისტებს არ ჩავთვლით) არასოდეს ყოფილან.#კორონასდავამარცხებთყველაფერიკარგადიქნება”, – წერს გია გაბრიჭიძე.