“მადლობა “მაესტროს“ მიპატიჟებისთვის, მაგრამ არაკორექტულია, მე არც უნდა დავჯდე ტელედებატებში,– განაცხადა ბიძინა ივანიშვილმა ტელეკომპანია “მაესტროს“ ჟურნალისტის კითხვაზე, რომელიც დავით უსუფაშვილთან, კახა შარტავასთან და ირაკლი ალასანიასთან ტელედებატებს ეხებოდა.
ივანიშვილმა ამ შეკითხვაზე პასუხის დროს ანეკდოტიც მოიყვანა.
“ანეკდოტი გინდა, მოგიყვეთ? ებრაელს „ობეხეესი“ მიადგა, ღამის 3 საათზე უკაკუნებენ, გააღეო, ვინ ხართო, ამ შუაღამისასო. ობეხეესიდან მოვედითო სალაპარაკო გვაქვსო, რამდენი ხართო, სამნიო, ხოდა, ილაპარაკეთ ერთმანეთშიო. მე რატომ უნდა დავჯდე ერთთან არ მეორესთან, იდებატონ ერთმანეთში. მე მაქვს უფლება, როგორც მოქალაქეს, აზრი გამოვთქვა“, – განაცხადა ივანიშვილმა.
ამასთან, ივანიშვილის განცხადებით, გამოითქვა ბრალდებები, თითქოს სასამართლოზე გავლენას ვახდენ.
“სასამართლოც წელში გასწორდა, რადგან ხელისუფლებაც აღარ ერევა და მეორე მხარეს ისე იოლად აღარ გასდის. “ნაცები“ გამწარებული არიან, რომ ვეღარ მართავენ სასამართლოს. გვარამია გამოდის, ქაფი აქვს პირზე პირდაპირი მნიშვნელობით და მოსამართლეებს მათრახით ცდილობს შემოუძახოს, სასამართლო გაუარესდაო ამბობს. რა თქმა უნდა, „ნაცებისთვის“ კატასტროფულად გაუარესდა ვითარება. სასამართლო ჯიბეში ჰყავდათ, დღეს ვეღარ იმორჩილებენ და საშინლად გაღიზიანებული არიან“,-განაცხადა ივანიშვილმა.