„კანონი და სამართალის“ ერთ-ერთმა ლიდერმა ირაკლი ღლონტმა პარტია დატოვა. როგორც მან „პრაიმტაიმნიუსთან“ საუბრისას განაცხადა, პარტიის დატოვების ძირითადი მიზეზი „სტრატეგია აღმაშენებლის“ ერთ-ერთი ლიდერის, გიორგი ვაშაძის პრემიერ-მინისტრობის კანდიდატად წარდგენის საკითხია.
„მე პარტია დავტოვე. განსხვავებული პოლიტიკური ხედვები გვქონდა ივანიშვილთან და რუსული მენტალიტეტის მქონე ხელისუფლების წინააღმდეგ ბრძოლის მექანიზმებთან დაკავშირებით. ვთვლი, რომ პრემიერ-მინისტრობის კანდიდატი უნდა ყოფილიყო შიდა პოლიტიკური კონსულტაციების შემდეგ გამოვლენილი. ვაშაძე ჩემი მეგობარია, პატივს ვცემ მას, მაგრამ მისი პრემიერობა უნდა შეთანხმებულიყო ყველაზე დიდი ელექტორალური ძალის მქონე პარტიასთან და არა მარტო მათთან, ყველა პარტიასთან.
ჩვენ არ გვაქვს იმის ფუფუნება, რომ ივანიშვილის და პუტინის მმართველობის რვა წლისთავზე შეუზღუდავი რესურსების მქონე ოლიგარქიის წინააღმდეგ ბრძოლის დროს, არ ვიყოთ კონსოლიდირებულები. ასე, რომ ჩვენ დავრჩით მეგობრები. ქალბატონ თაკოს დღეს კორონავირუსი დაუდასტურდა და როგორც ჩემს მეგობარს, ვუსურვებ გამოჯანმრთელებას“,- განაცხადა ღლონტმა.
კითხვაზე, შეუერთდება თუ არა ის რომელიმე პარტიას და მიიღებს თუ არა საპარლამენტო არჩევნებში მონაწილეობას, ღლონტი გვპასუხობს:
„მე მქონდა რამდენიმე პოლიტიკური შემოთავაზება პარტიების მხრიდან, მათ შორის, მსხვილი პოლიტიკური პარტიის მხრიდან, მათ მადლობას ვუხდი, თუმცა მე მივიღე გადაწვეტილება, რომ 2020 წლის საპარლამენტო არჩევნებში ვიქნები ჩართული, როგორც აქტიური მოქალაქე და არა მაჟორიტარობის კანდიდატი. საბოლოო ჯამში, მაინც, შესაძლოა, სახელმწიფო ინტერესებიდან გამომდინარე, სხვა ფორმატით ჩავერთო არჩევნებში“,- განაცხადა ღლონტმა.
ინფორმაციისთვიის, პარტია “კანონი და სამართლის“ დამფუძნებელმა თაკო ჩარკვიანმა და „ახალი საქართველოს“ ერთ-ერთმა ლიდერმა გიორგი ვაშაძე პოლიტიკური პლატფორმა „სტრატეგია აღმაშენებელი“ შექმნეს. ამ გაერთიანების პრემიერ-მინისტრობის კანდიდატი გიორგი ვაშაძეა.