ლევან გოგიჩაიშვილი – მაჟორიტარი დეპუტატები, რომლებმაც ბოლო 4 წლის განმავლობაში საბურთალოს რაიონში კენჭი იყარეს, ამომრჩევლებს თვალით არ უნახავთ

პრაქტიკა გვაჩვენებს, რომ არც ერთი მაჟორიტარი დეპუტატი, რომელმაც ბოლო ოთხი წლის განმავლობაში საბურთალოს რაიონში კენჭი იყარა, ამომრჩევლებს თვალით არ უნახავთ, – ამის შესახებ საბურთალოს მე-6 ოლქის მაჟორიტარი დეპუტატობის კანდიდატმა ლევან გოგიჩაიშვილმა ტელეკომპანია PALITRANEWS-ის გადაცემაში ”360 გრადუსი” სტუმრობისას განაცხადა.
მისი თქმით, აღნიშნულ ოლქში საკმაოდ დიდი კონკურენციაა და ამომრჩეველმა უნდა გადაწყვიტოს, ვინ იქნება უკეთესი ინტერესების დამცველი საქართველოს პარლამენტში.
ლევან გოგიჩაიშვილი დარწმუნებულია, რომ როგორც საბურთალოს მე-6 მაჟორიტარულ ოლქში, ისე სხვა ოლქშებიც ”ქართული ოცნება” და მისი მაჟორიტარი დეპუტატობის კანდიდატები ძალიან დიდი უპირატესობით გაიმარჯვებენ.
მისივე თქმით, გუნდთან ერთად პასუხისმგებლობას იღებს საქართველოს მომავალზე და ამომრჩევლისთვის შეთავაზებულ პროგრამაზე.
”მაჟორიტარი დეპუტატი ზოგადად დიდი უფლებებით არ არის აღჭურვილი, მაგრამ ბოლო პრაქტიკა გვაჩვენებს, რომ ყველა მაჟორიტარი დეპუტატი, რომელმაც ბოლო ოთხი წლის განმავლობაში საბურთალოს რაიონში კენჭი იყარა, ამომრჩევლებს თვალით არ უნახავთ. იცით, პრობლემები გვაქვს იმ თვალსაზრისით, რომ ყველა თვითმმართველობის დეპუტატი ახლა არის ოპოზიციის წარმომადგენელი. ეს ადამიანები ”ქართული ოცნებიდან”, კოალიციით გავიდნენ”, – აღნიშნა ლევან გოგიჩაიშვილმა.
გადაცემის წამყვანის შეკითხვაზე, გულისხმობს თუ არა დავით უსუფაშვილს, გოგიჩაიშვილმა უპასუხა, რომ ყველა იმ ადამიანს გულისხმობს, ვინც ”ქართული ოცნებით” იყარა კენჭი ამ მაჟორიტარულ ოლქში.