ზვიად ძიძიგური – სააკაშვილი შევარდნაძის პერიოდში ჩარჩა – დესტაბილიზაცია გამორიცხულია

„კონსერვატიული პარტიის“ ერთ-ერთი ლიდერი ზვიად ძიძიგური „თავისუფალი ზონის“ წევრების განცხადებას ეხმაურება, რომლის მიხედვითაც სააკაშვილი არჩევნების შემდეგ დესტაბილიზაციის მოწყობისთვის მათი ორგანიზაციის გამოყენებას გეგმავდა. ძიძიგური დესტაბილიზაციის ალბათობას გამორიცხავს.
„ჩვენ ვიცოდით, რომ „ნაციონალური მოძრაობა“ პროვოკაციების მოწყობას გეგმავდა. ამ პრესკონფერენციით ეს კიდევ ერთხელ დადასტურდა. სააკაშვილმა პირწმინდად იცის, რომ არჩევნები წაგებული აქვს. ჩვენი ხელისუფლება არავითარ პროვოკაციას არ დაუშვებს. არანაირი დესტაბილიზაცია მოსალოდნელი არ არის. „ნაციონალურ მოძრაობას” პროვოკაციის მოსაწყობად არც რესურსი გააჩნია და არც არანაირი შესაძლებლობა. ეს მხოლოდ და მხოლოდ მათი სურვილია. ის რომ „ნაციონალური მოძრაობა“ დესტრუქციული ძალაა, ეს ჩვენ ყველამ კარგად ვიცით. ამ ქვეყანაში გამართულად მუშაობს ყველა ის სამსახური, რომელიც ქვეყნის უშიშროებას, მის სტაბილურობას და მოქალაქეების უსაფრთხოებას იცავს და უზრუნველყოფს. მიხეილ სააკაშვილი შევარდნაძის დროინდელ პერიოდში ჩარჩა, როდესაც რევოლუციის მოწყობა მოახერხა. ეს დრო საქართველოში დიდი ხანია წავიდა, მაგრამ მიხეილ სააკაშვილი ისევ იქ არის, 2003 წელში“, – განაცხადა ძიძიგურმა.
ძიძიგურის განცხადებით, ნებისმიერი ადამიანი, ვინც არჩევნებზე კანონს დაარღვევს, მთელი სიმკაცრით დაისჯება.