სიტყვიერი და ფიზიკური დაპირისპირების შემდეგ ცესკოში სხდომა განახლდა, თუმცა ოპოზიციის წარმოამდგენლებთან კამათის და შეხლა-შემოხლის გამო ცოტა ხნის წინ თავმჯდომარეს, თამარ ჟვანიას შესვენების გამოცხადება მოუხდა. ჟვანიამ ასევე „ევროპული საქართველოს“ წარმომადგენლის, ხათუნა გოგორიშვილის სხდომიდან გაძევების საკითხიც დააყენა.
ხათუნა გოგორიშვილმა მოითხოვა განმარტება, თუ რის საფუძველზე ხდებოდა შედეგების დაჯამება – ოლქების თუ საუბნო კომისიების მიხედვით, თამარ ჟვანიამ კი აღნიშნა, რომ ცესკო დღეს აჯამებს შედეგებს ოლქებიდან მიღებული შემაჯამებული ოქმების მიხედვით.
ხათუნა გოგორიშვილმა ჟვანიას თანამდებობის დატოვებისკენ მოუწოდებდა, და იქიდან გამომდინარე, რომ ოპოზიციის ზოგიერთი წარმომადგენელი სხდომის მიმდინარეობას უშლიდა ხელს, დაცვის პოლიციამ გოგორიშვილი დარბაზიდან გაიყვანეს, რასაც ხმაური და შეხლა-შემოხლა მოყვა.
ცესკოს სხდომის დღის წესრიგში 22 საკითხია, მათ შორის პირველია საჩივრები. პრაქტიკულად ყველა ოპოზიციური პარტიის წარმომადგენლები ასაჩივრებენ შემაჯამებელ ოლქებს და ამ საჩივრების ჩამონათვალში არის ახალგაზრდა იურისტთა ასოციაციის საჩივარიც. ოპოზიცია ითხოვს საოლქო საარჩევნო კომისიების ოქმების გაუქმებას და ხელახალი საპარლამენტო არჩევნების დანიშვნას.
გარდა ამისა, კომისიის სხდომაზე საჩივრების ავტორებმა ასევე გააპროტესტეს საჩივრების გაერთიანება ერთ განკარგულებაში, რაზეც ცესკოს თავმჯდომარისგან მიიღეს განმარტება, რომ ეს არის ცესკოს პრაქტიკა, რომელიც კანონს არ ეწინააღმდეგება. ოპოზიციამ ასევე განაცხადა, რომ ცესკო შედეგების დაჯამებას ჩქარობს. თამარ ჟვანიამ კი მათ უპასუხა, რომ შუალედური შედეგები 19 ნოემბრამდე უნდა გამოცხადდეს, რათა გარკვეულ მაჟორიტარულ ოლქებში არჩევნების მეორე ტური გაიმართოს, ხოლო საბოლოო შედეგების გამოცხადების ვადა 10 დეკემბრამდეა განსაზღვრული.