“ტაძრები არ დაიკეტება, ეს გამორიცხულია, ღვთისკენ მიმავალ ადამიანს მე როგორ უნდა შევუშალო ხელი?”

ქუთაის-გაენათის ეპარქიის მიტროპოლიტმა იოანემ, “კურიერის” კითხვას პანდემიასთან დაკავშირებით არსებულ შეზღუდვებზე უპასუხა, რომ ტაძრები არ დაიკეტება.

მისი თქმით, რეგულაციებს იცავენ, ტაძარში მისვლას კი ადამიანებს ვერავის აუკრძალავენ.

“ტაძრები არ დაიკეტება, ეს გამორიცხულია, ეს უნდა გვესმოდეს, ღვთისკენ მიმავალ ადამიანს მე როგორ უნდა შევუშალო ხელი? გამორიცხულია. ნებაყოფლობითაა, ჩვენ ხომ არ ვაიძულებთ მოსვლას? რადგან მოვიდა, მოვიდა, მე არ უნდა გავაგდო. პანდემია კი შემოვიდა  ტაძარშიც, მაგრამ, ასევე ექიმებშიც არის, მთავარი ეპიდემიოლოგი ინფიცირებულია. გარანტირებული არავინაა, ადამიანები ვართ, მაგრამ ჩვენ ვამბობთ, რომ განსაცდელი შეიძლება ყველა ადამიანს შეხვდეს, მაგრამ ამის შიშით, ცხოვრება არ გამოვა, იმედით და რწმენით უნდა ვიყოთ, თუ შეგვემთხვა განსაცდელი, მოთმინებით უნდა ვიყოთ. სამწუხაროდ, შედარებით ახალგაზრდა სასულიერო პირი გარდაიცვალა, მას დაავადებები ჰქონდა და რისკი იყო დიდი, მაგრამ ის ეკლესიაში არ დაინფიცირებულა. ეკლესიაში კი არ ინფიცირდება, არამედ ადამიანი ადამიანს გადასცემს, ეკლესიას ნუ დავაბრალებთ,” – განაცხადა მიტროპოლიტმა იოანემ.