ბათუმში, კორონავირუსით ექიმის გარდაცვალების მიზეზებზე მედიასთან კომენტარი რესპუბლიკური საავადმყოფოს კლინიკურმა მენეჯერმა გიორგი კიკაბიძემ გააკეთა.
„ბათუმის რესპუბლიკური საავადმყოფოს გუნდს, კიდევ ერთი შესანიშნავი ადამიანი დააკლდა. იგი თავის შინაგანი კულტურითა და პატიოსნებით გამოირჩეოდა. ავადმყოფებზე შეყვარებული ექიმი, რომელსაც პაციენტი გაჭირვების ჟამს არასდროს მიუტივებია“, – განაცხადა გიორგი კიკაბიძემ.
მისი თქმით, შოთა ბერიძე 63 წლისა გარდაიცვალა და მას ქრონიკული თანმდევი დაავადება ჰქონდა.
„რამდენიმე დღის წინ, მას კორონავირუსი დაუდგინდა და 3-4 დღე კოვიდ-სასტუმროში იმყოფებოდა და 6 დეკემბერში ჩვენს კლინიკაში მოათავსეს. მას კომპიუტერული ტომოგრაფია ჩაუტარდა და ფილტვის 45 პროცენტიანი დაზიანება, და ორმხრივი პნევმონია აღენიშნებოდა. ფილტვების შეშუპების გამო, გუშინ მართვით სუნთქვაზე გადავიყვანეთ, ჩატარებული ღონისძიებების მიუხედავად მისი გადარჩენა ვერ მოხერხდა. ქრონიკული თანმხლები დაავადებები ჰქონდა, იგი ექიმი-ტრავმატოლოგის პოზიციაზე მუშაობდა. 2011 წლიდან რესპუბლიკურ საავადმყოფოში, ხოლო მანამდე ქალაქის პირველ საავადმყოფოში მუშაობდა. კლინიკაში მოყვანის დროს კონტაქტური იყო. მას კოვიდ-სასტუმროში ძალიან კარგი ექიმები მკურნალობდნენ“,- განაცხადა კიკაბიძემ.