მომღერალმა თამრიკო ჭოხონელიძემ ,,ტვ პირველის” ეთერში, ინგა გრიგოლიას გადაცემაში ,,რეაქცია” ქვეყანაში მიმდინარე მოვლენებზე და არსებულ პრობლემებზე ისაუბრა.
ჭოხონელიძე აღნიშნავს, რომ გადაცემაში ჩართვაზე ორჭოფობდა, რადგან მანამდე ინგასთან ერთ-ერთ გადაცემაში გაკეთებული განცხადებების შემდეგ, მასზე ბულინგი განხორციელდა.
„თუ გინდა ხუმრობაში ჩამითვალე, მაგრამ ცუდად დავცადე შენს გადაცემაში მონაწილეობა. მე ღიად შენს ეთერში გამოვხატე დამოკიდებულება, ჩემთვის მიუღებელი საკითხისადმი. მიუხედავად იმისა, რომ არ მოგწონს ვინმეს რელიგიური მრწამსი, რასა, ორიენტაცია ამიტომ უნდა ჩაიქოლოს ადამიანი?
ამ მიზეზით ხშირად ხდება ადამიანის დისკრედიტაცია, სამსახურებიდან გათავისუფლება, თუ არ მუშაობს არ იღებენ, ხდება დაბულინგება ამ ადამიანების, აი ამის წინაღმდეგ წავედი მე…
მას შემდეგ, ტოლერანტ ადამიანთა ჯგუფმა გადაწყვიტა, რომ შობის ღამეს მე ტაძარში აღარ უნდა მეგალობა, გარკვეული სამაგიერო გადამიხადეს, შეიძლება ასე ითქვას, თავიანთი „დიდსულოვანი“ ბუნებიდან გამომდინარე მე დამსაჯეს.
შეიძლება ეს მე შემმთხვეოდა ან მას, ვინც მათ ფეხქვეშ არ გაეგებოდა. ამჯერად, უბრალოდ მე შემეხო და ამიტომ ვამბობ.
ეს ის რგოლია, ვისგანაც უნდა ვიგებდეთ, როგორ უნდა ვიყოთ მიმტევებლები, ლმობიერები, როგორ უნდა ვინდობდეთ ერთმანეთს და ა.შ.
ეს ნათელი მაგალითია, როგორ დასაჯეს ადამიანი, რომელიც მათ ბრმად არ წაყვა და თავისი აზრი გამოხატა.
ძალიან ბევრი კითხულობს, ამ შობას როგორ იქნებაო? არა, არაფერი არ იქნება…. რა უნდა დავარქვა ამას? დავარქმევ თუ არა შურისძიებას? კი, რა თქმა უნდა… როცა ერში ასეთი სიმძაფრეა ნუ გვიკვირს, იმიტომ რომ ბერშიც ხდება ასეთი რამ. არავინ იფიქროს, რომ ამაზე ვარ გაბრაზებული. გაბრაზებული კი არ ვარ, გულნატკენი ვარ.
მე მინდა მათ ვუთხრა, რომ როდესაც ტაძარში ვიდექი და ვასრულებდი საგალბელს, იმ ხალხთან ერთად, რომელიც ქვევით იყო სამებაში, მე მრევლი ვიყავი, ის არ იყო აუდიტორია ჩემთვის, კონცერტზე არ ვიყავი, ჩვენ ყველა ერთად უზენაესისთვის ვასრულებდით ამ ყველაფერს… უფლისთვის გალობას მე სახლშიც ვახერხებ…
მინდა ვუთხრა ამ ხალხს, რომ მე ისევ მოგისმენთ, ოღონდ მიმტევებლობაზე მელაპარაკეთ, შურისძიებისკენ ნაბიჯი აღარ გადადგათ“-აღნიშნავს თამრიკო ჭოხონელიძე „ტვ პირველის“ ეთერში.