ახალი წელი შედგება იმ ფონზე, როდესაც ჩვენ ყოველდღიურ სიკვდილიანობა ჯერჯერობით საკმაოდ მაღალი გვაქვს, – ამის შესახებ მთავრობის სხდომის შემდეგ გამართულ ბრიფინგზე ეკონომიკის მინისტრმა, ნათია თურნავამ განაცხადა.
„მოდის ახალი წელი და ბუნებრივია ჩვენი ტურისტული ინდუსტრიაც, სადაც შეზღუდვები არ გავრცელდა, ემზადება ამისთვის. ყველას შევახსენებ, განსაკუთრებით სასტუმროებს, რომ არსებობს მთავრობის მიერ დაწესებული შეზღუდვები ეს არის იზოლაციისა და კარანტინის შესახებ საქართველოს მთავრობის 23 მაისის 322-ე დადგენილება, რომლის თანახმადაც მკაცრად იკრძალება კულტურული ღონისძიებები მაყურებლის დასწრებით. ყველა სასტუმროს, რომელიც საახალწლოდ ელოდება სტუმრებს, შევახსენებ ამ შეზღუდვას და მოგვიწევს მკაცრად დავიცვათ ის. ზედმეტია იმაზე საუბარი, რომ ეს ახალი წელი არის განსხვავებული. ეს ახალი წელი შედგება იმ ფონზე, როდესაც ჩვენ ყოველდღიურ სიკვდილიანობა ჯერჯერობით საკმაოდ მაღალი გვაქვს. მართალია მოკრძალებული დადებითი ტენდენციები ჩვენ გვაქვს, სწორედ წერტილოვანი შეზღუდვების ღონისძიებების კვალობაზე. ჩვენ ძალიან ვუფრთხილდებით ამ პირველ, ზომიერ ოპტიმისტურ ნიშნებს და ახალი წელი ვიზეიმოთ სახლებში, ვიზეიმოთ მოკრძალებულად და ნუ დავარღვევთ კანონმდებლობით დაწესებულ შეზღუდვებს. ეს გაფრთხილება ყველა სასტუმროს გაეგზავნა წერილობით ჩვენი ტურიზმის ადმინისტრაციის მხრიდან და ყველას მოვუწოდებ, რომ ძალიან ყურადღებით მოეკიდოს ამ საკითხს“, – განაცხადა თურნავამ.