ვირუსის მუტაცია ჩვეულებრივი მოვლენაა და ხდება ხოლმე. ვიდრე ეს შტამი გამოჩნდებოდა, კორონავირუსმა დაახლოებით ათასამდე მუტაცია განიცადა, – ამის შესახებ ნორვეგიის სამეფოს ჯანდაცვის სამინისტროს უფროსმა მრჩეველმა, ზაზა წერეთელმა, „რუსთავი 2-ის“ ეთერში განაცხადა.
„ვირუსის ახალი მუტაცია, რომელიც გაერთიანებულ სამეფოში დაფიქსირდა, ერთ-ერთი განსხვავება, რამაც მეცნიერები დააფიქრა არის, რომ ვირუსს აქვს ე.წ. „სპაიკი“, რომლის საშუალებითაც აღწევს ადამიანის უჯრედში. ეს შტამი უფრო სწრაფად აღწევს ადამიანის ორგანიზმში და უფრო სწრაფად დაიწყო გავრცელება“, – განაცხადა ზაზა წერეთელმა.
მისი თქმით, ახალი შტამით გამოწვეული მძიმე შემთხვევები ჯერჯერობით არ დაფიქსირებულა.
„ჯერჯერობით მძიმე შემთხვევები არ არის. მხოლოდ და მხოლოდ შემთხვევის რაოდენობა გაიზარდა და არა სიმძიმე. კიდევ 4 ქვეყანაში აღმოაჩინეს კორონავირუსის ახალი შტამი და ევროპის სხვა ქვეყნებშიც იკვლევენ, რომ ნახონ ეს ახალი შტამი მძიმედ ხომ არ მიმდინარეობს, მაგრამ ჯერჯერობით ასეთი ფაქტი არ დაფიქსირებულა“, – განაცხადა ზაზა წერეთელმა.
14 დეკემბერს მეცნიერებმა კორონავირუსის ახალი სახეობა აღმოაჩინეს. ჯანდაცვის მსოფლიო ორგანიზაციაში განაცხადეს, რომ ჯერ არ არსებობს იმის მტკიცებულება, რომ დიდ ბრიტანეთში აღმოჩენილი კორონავირუსის ახალი სახეობა სერიოზულ გავლენას ახდენს ვირუსის სტრუქტურაზე. დიდი ბრიტანეთის ჯანდაცვის მდივანმა, მეთ ჰენკოკმა განაცხადა, რომ ვირუსის ახალი სახეობა შედარებით სწრაფად ვრცელდება, თუმცა უფრო საშიში არ არის.