“რუსთავი 2“ და „ნაციონალური მოძრაობა“ მგონი, საკუთარი თავის მარგინალიზებას ახერხებენ ბოლომდე, რაც ჩვენი ამომრჩევლისთვის ძალიან კარგია, გაუიოლდებათ არჩევანის გაკეთება, – ასეთი კომენტარი გააკეთა ბიძინა ივანიშვილმა კითხვაზე, რომელიც შეეხებოდა „რუსთავი 2“-ის ეთერში გასულ სიუჟეტს, რომლის მიხედვითაც, ბიძინა ივანიშვილი აცხადებს, რომ „ნაციონალურ მოძრობას“ 30% უჭერს მხარს.
„ისინი კადაფიზაციით, რევოლუციით გვემუქრებიან, რისი რესურსიც მათ არ აქვთ. საბოლოო ჯამში, თვითონვე ახერხებენ საკუთარი თავის მარგინალიზაციას და კიდევ გავიმეორებ, ეს ამომრჩეველს გაუიოლებს არჩევანის გაკეთებას. არ გამოვრიცხავ, ბოლო კვირაში ხმების მიხედვით პრინციპულად შეიცვალოს სიტუაცია. რეალობა ასეთია, რომ უარყოფითი ძალაა და მთელი ცხოვრება, 9 წლის განმავლობაში ატყუებდნენ საკუთარ საზოგადოებას, სიცრუეზე იყო აგებული, ვირტუალურ სამყაროში ცდილობდნენ ეცხოვრებინათ და ეს ერთი ჯგუფი იყოფს ყველაფერს. როგორ არ უნდა გიყვარდეს საკუთარი საზოგადოება, რომ ასე მოექცე”, – განაცხადა ბიძინა ივანიშვილმა.
ყოფილმა პრემიერ-მინისტრმა აღნიშნა, რომ „ნაციონალური მოძრაობის“ მხარდამჭერებსაც შეუძლიათ ნახონ, როგორც ამახინჯებს „რუსთავი 2“ მის სიტყვებს.
„აქ ხომ აღარ უნდა არაფრის ანალიზი. შეუძლიათ აიღონ ჩემი ნათქვამი, იქ არ არის არანაირი გადაცდომა, არ არის რთული წინადადება, შეუძლიათ ნახონ „რუსთავი 2“ ამას როგორ ამახინჯებს, როგორ შემოაქვთ 30%. მათი გაქცეული ლიდერიდან დაწყებული და აქაური ლიდერებიც, საკუთარი შტაბიდან, სასწრაფოდ ახმოვანებენ, რომ ივანიშვილიც კი აღიარებს 30%. მისვამდნენ კითხვებს 3 დღის განმავლობაში, რა უნდათ, ამას რატომ ამბობდნენ, რაში სჭირდებათ. „ნაცებს“ ტყუილი რაში სჭირდებათ, ეგ რა კითხვაა – მეთქი და აი თურმე, რაში სჭირდებოდათ, ხომ ნახეთ. აი, ამის გამართლება უნდოდათ, 26% რომელიც მოიტყუეს და იცრუეს”, – განაცხადა ბიძინა ივანიშვილმა.
მისივე თქმით, „რუსთავი 2“-ს პრიმიტიული სიცრუით, უნდოდა რთული სიცრუის გამართლება.
„ესეც ნახონ, საერთოდ რა დაეჯერება მაგათ კვლევებს. ახლა წარმოიდგინეთ, ეგზიტპოლებს „რუსთავი 2“ რომ ჩაატარებს და თანაც, გამოდის მაგათი უკრაინელი ლიდერი და საუბრობს შედეგებზე. უკრაინელია, ქართველობაზე, საქართველოს მოქალაქეობაზე უარი თქვა მაგან, არ წამომცდენია , უკრიანელია მართლაც. როგორ უკუღმა აქვთ მაგ საცოდავებს ყველაფერი დაყენებული და კიდევ შედეგებს ელოდებიან. ძალიან ცუდ დღეში არიან და საკუთარი თავის მარგინალიზაცია მიანიშნებს, რომ აგონიაში არიან, მათ არ აქვთ რესურსი. მათ გააცნობიერეს, რომ არ გამოვიდა, საზოგადოება ისეთი სულელი არ არის, როგორიც მათ ეგონათ და ესღა დარჩათ, თვითონვე, საკუთარ თავსვე აჩვენებენ მაქსიმალურად. როდესაც აღარ გაქვს თავი უნდა გაჩერდე, გაჩერება მათ არ შეუძლიათ და მივიღეთ ის, რაც მივიღეთ”, – განაცხადა ბიძინა ივანიშვილმა.