ირაკლი კობახიძე – შემაშფოთებელია ისიც, რომ როგორც გვარამიამ ბრძანა, საუბარი ჩაწერილია მაშინ, როცა სასამართლოში ”რუსთავი 2”-ის საქმე იხილებოდა

„ქართული ოცნების” აღმასრულებელი მდივანი ირაკლი კობახიძე შემაშფოთებელს უწოდებს ”რუსთავი 2”-ის გენერალური დირექტორის ნიკა გვარამიას და თბილისის საქალაქო სასამართლოს ყოფილი თავმჯდომარის მამუკა ახვლედიანის სატელეფონო საუბრის შინაარსს.
როგორც კობახიძემ ჟურნალისტებს განუცხადა, შემაშფოთებელია, რომ საუბარი ჩაწერილია იმ დროს, როცა თბილისის საქალაქო სასამართლოს ახვლედიანი ხელმძღვანელობდა და იმ პერიოდში სასამართლოში ”რუსთავი 2”-ის საქმის განხილვა მიმდინარეობდა. კობახიძის თქმით, საუბარში ჩანს ბატონყმური დამოკიდებულება გვარამიასა და ახვლედიანს შორის. მან აქვე იმედი გამოთქვა, რომ ანალოგიური დამოკიდებულებით არ განიხილება ”რუსთავი 2” -ის საქმე უზენაეს სასამართლოში.
”საუბრის შინაარსიდან გამომდინარე აშკარად ჩანს, როგორია დამოკიდებულება ”რუსთავი 2”-ის ხელმძღვანელსა და საქალაქო სასამართლოს მაშინდელ თავმჯდომარეს შორის. ჩანს, რომ ეს დამოკიდებულება არის ბატონყმური. შემაშფოთებელია ისიც, რომ როგორც გვარამიამ ბრძანა საუბარი ჩაწერილია მაშინ, როცა საქალაქო სასამართლოში ”რუსთავი 2”-ის საქმე იხილებოდა. გარდა ამისა, ნიკა გვარამია სასამართლოს თავმჯდომარეს პირდაპირ ჰპირდება მატერიალურ სარგებელს და იკვეთება ეჭვი და ნიშნები ქრთამის გადაცემის თაობაზე, რაც აუცილებლად უნდა იყოს გამოძიებული”,- განუცხადა ჟურნალისტებს ირაკლი კობახიძემ.