“ნაციონალური მოძრაობა“ არ მოეშვა თავის საყვარელ საქმიანობას, პირად ცხოვრებაში ჩარევას და ძალადობას ფსიქოლოგიურად“

”ნაციონალურ მოძრაობას” აქვს დიდი, მდიდარი და ხარისხიანი გამოცდილება ფარული ჩანაწერების, შანტაჟის და კომპრომატების და ეს ტალღა მათი აგორებულია, – ასე შეაფასა განათლებისა და მეცნიერების მინისტრმა ალექსანდრე ჯეჯელავამ ბოლო დროს გავრცელებულ ჩანაწერებთან დაკავშირებით პროცესები.
”ჩვენი ოპონენტები „ნაციონალური მოძრაობა“ არ მოეშვა თავის საყვარელ საქმიანობას, პირად ცხოვრებაში ჩარევას და ძალადობას ფსიქოლოგიურად. ვფიქრობ, რომ ეს მათი აგორებულია. ჩვენ უნდა დავემშვიდობოთ ყველანაირ ძალადობას და ასეთი აკრძალული ილეთების გამოყენებას. ვგულისხმობ ყველა მხარეს, ვისაც შეიძლება აზრად მოუვიდეს ასეთი მეთოდების გამოყენება. ჩვენ გვჭირდება საზოგადოება, რომელიც ერთმანეთს შეეჯიბრება პოლიტიკურ ხედვებში, დაპირებებში და არა სიბინძურეში. „ნაციონალურ მოძრაობას“ აქვს მდიდარი და ხარისხიანი გამოცდილება ფარული ჩანაწერების, შანტაჟის, კომპრომატების და ეს ტალღა მათი აგორებულია”, – განაცხადა ალექსანდრე ჯეჯელავამ.
ჟურნალისტები მინისტრისგან დაინტერესდნენ  გავრცელებული ინფორმაციით იმის შესახებ, რომ „რუსთავი 2“-ში სავარაუდოდ იგეგმება სპეცოპერაცია ნარკორეალიზატორების დასაკავებლად.
”მგონია, რომ ამ წუთას ყველაზე მეტად ჩვენს ოპონენტებს გაუხარდებათ ასეთი რამ. ხელისუფლების ინტერესში არ არის არც „რუსთავი 2“-ის და არც სხვა მედიასაშუალების შევიწროვება. გამოვრიცხავ ასეთ ქმედებას სახელმწიფოს მხრიდან, თუმცა პროვოკაციები ”ნაციონალური მოძრაობიდან” და სხვა ოპოზიციური ორგანიზაციების მხრიდან გამორიცხული არ არის”, – განაცხადა ალექსანდრე ჯეჯელავამ.