შობის დღესასწაულთან დაკავშირებით ჩვენი სამზადისი დადგენილ საზომს არ სცილდება და არც ვარღვევთ მას, – ამის შესახებ Imedinews-ს მეუფე დავითმა განუცხადა.
აბბა ალავერდელი მიტროპოლიტის გადაწყვეტილებით, პანდემიის ფონზე საშობაო ალილოც შეცვლილი ფორმით, ახალი წესებითა და მრევლის გარეშე ჩატარდება. მეუფის განმარტებით, მსვლელობაში მონაწილეობას მხოლოდ სასულიერო პირები და სტიქაროსნები მიიღებენ.
„რეგულაციები ძალაშია, ადგილზე მონიშვნებია, მრევლი პირბადით მოდის მსახურების დროს, იცავენ დისტანციას. 00:00 საათზე დავიწყებთ სადღესასწაულო მსახურებას, პურის კურთხევას, ცისკარს, ჟამობასა და წირვას. ალბათ, ვინც მოვა ტაძარში, ყველას ექნება ზიარებაზე კურთხევა.
სანამ დაიწყება მსახურება, ზიარებამდე ჩაუტარდებათ ტესტირება მრევლის წევრებსაც, თუ მათ ექნებათ ამისი სურვილი, ასევე, სტიქაროსნებს, ხოლო სასულიერო პირებს ყველას აქვს ლოცვა-კურთხევა ტესტის გაკეთების, მათი პირადი გადაწყვეტილებით ისინი ამას შეასრულებენ.
საშობაო ალილოზე მრევლი არ იქნება, მეტწილად იქნებიან სასულიერო პირები და მათი დამხმარე სტიქაროსნები, მცირე გუნდი, რომელიც ოჯახებთან კი მივა, მაგრამ დიდხანს დაყოვნება და საუბარი არ იქნება. მოგროვილი ნობათი სოციალურად დაუცველებს გადაეცემა“, – განაცხადა მეუფე დავითმა.