„პრაიმტაიმისთვის“ ცნობილი გახდა, რომ ტელეკომპანია „ფორმულაში“ საკადრო ცვლილებაა. გიორგი ლაფერაშვილი საინფორმაციო სამსახურის ხელმძღვანელი აღარ იქნება. ამის შესახებ ტელევიზიაში თათბირზე ჟურნალისტებს გუშინ თავად განუცხადა. თუ ვინ დაიკავებს მის ადგილს, ეს უახლოეს დღეებში გახდება ცნობილი.
ასევე ცნობილია, რომ „ამერიკის ბიურო“ იხურება და ახალ ამბებს ამერიკიდან „ფორმულასთვის“ აღარ მოამზადებენ. თუმცა, ამ ინფორმაციას გიორგი ლაფერაშვილი „პრაიმტაიმთან“ საუბრისას არც უარყოფს და არც ადასტურებს.
„ფორმულანიუსს“ მე აღარ ვუხელმძღვანელებ, თუმცა სამუშაოდ ისევ ამ ტელეკომპანიაში ვრჩები, ახალ გადაცემებზე ვმუშაობთ. სამწუხაროდ, პანდემიამ ჩვენი ტელევიზიის ბიუჯეტზეც უარყოფითად იმოქმედა, მოგეხსენებათ რეკლამები იმავე სიხშირით აღარ გადის, როგორც ეს პანდემიამდე იყო“,- ამბობს გიორგი ლაფერაშვილი.
რაც შეეხება ამერიკის ბიუროს დახურვასთან დაკავშირებით კითხვას ლაფერაშვილი პასუხობს:
„არ ვიცი, ამაზე კომენტარს ვერ გავაკეთებ, თუმცა კიდევ გავიმეორებ, რომ შემოქმედებითი გადაცემები დაიწყება, რომლებზეც ახლა ვმუშაობთ.“ – აცხადებს ლაფერაშვილი.
გავრცელებული ინფორმაციით, საინფორმაციოს ხელმძღვანელის პოსტზე ნინო ჟიჟილაშვილი და ეკა შანიძე განიხილებიან, თუმცა ამ ინფორმაციას არავინ ადასტურებს. ამასთან, არ არის გამორიცხული „ფორმულანიუსის“ ხელმძღვანელის პოსტი საერთოდ გაუქმდეს.
„პრაიმტაიმი”