“რამხელა ფუფუნებაა, ასეთი თანამშრომელი რომ ჰყავს, ნეტავ, თუ იცის “ბაზისბანკმა”, – ამის შესახებ სოციალური ქსელის მომხმარებელი თაკო გვაზავა შსს-ს დაცვის პოლიციის თანამშრომელზე, უმცროს ინსპექტორ გიორგი წოწორიაზე წერს და ჰყვება, თუ როგორ ეხმარებოდა მოქალაქეებს აღნიშნული პირი.
“Basisbank – ბაზისბანკი წერეთლის ფილიალში შევედი დღეს.
კარებშივე შემეგება ახალგაზრდა დაცვის ბიჭი, დიდი რიგია და ცოტა ხანს დაიცადეთო, მთხოვა. რამდენიმე წუთში თვითონვე დამიძახა, უცბათ გამიზომა სიცხე, ხელები დაიმუშავეო და პარალელურად ორი ახალი კლიენტი შეაჩერა თავაზიანად. მობრუნდა და სანამ მე ვიაზრებდი, გეზი საით ამეღო, დაინტერესდა, რა საქმეზე ხართო. ვუპასუხე. მაგ მიმართულებით ოპერატორი დაგეხმარებათ და არა მოლარე, აიღეთ რიგის ნომერიო. უჰ, გაიხარე შენ-მეთქი. დავჯექი, ველოდები.
მოკლედ, სანამ მე იქ ვიყავი, ეს ბიჭი დაცვაც იყო, მითერიც, კრიზისმენეჯერიც და მენეჯერის ასისტენტიც. მკვირცხლად არკვევდა, ვის რა საქმე ჰქონდა, ამისამართებდა, ვიღაცებს მენეჯერთან საკუთარი ინიციატივით მიეგზავნა (მათ შორის, მეც), გეხვეწები, პატარა საქმე აქვთ და ამოუბეჭდე, ნუღარ დავაყოვნებთო. თვითონ ფილიალის მენეჯერიც ძალიან ფრენდლი და მოტივირებული იყო, ესეც აუცილებლად უნდა აღვნიშნო.
ასე უცბათ მოუგვარა საქმე, მენეჯერის უშუალო ჩართვით, პატარა ბავშვით შემოსულ მამას და სანამ მამა სალაროში ფულს იხდიდა, ბავშვს ნაძვის ხესთან ართობდა. გარკვეული მიზეზების გამო რიგი რომ დამეკარგა, სასწრაფოდ ჩაერია და სამართლიანად აღმიდგინა დაკარგული რიგის უფლება. იქვე აზვირთებულნერვებიანი ქალბატონი უცბათ დააწყნარა, დააშოშმინა, ნუ ღელავთ, მალე გაგიშვებთო. ამ ყველაფერს აკეთებდა მარდად, თავაზიანად და კეთილგანწყობით, ზედმეტი ხმაურის, რუზრუზისა და შეწუხების გარეშე. ჰოპ! და მოგვარებული ჰქონდა.
აი, ხომ არიან ასეთი თვითნაბადი მარგალიტები, შინაგანად ლიდერები, უქმედ, უაზროდ დგომა რომ არ შეუძლიათ და მხოლოდ ცარიელ-ტარიელი მოტივაციით რომ შეუძლიათ ადამიანებს თითქოს უმნიშვნელო, მაგრამ სინამდვილეში ძალიან მნიშვნელოვანი სარგებელი და კომფორტი მოუტანონ.
მთელი დღეა, მომყვება ამ კარგ ადამიანზე ფიქრი. რამხელა ფუფუნებაა, ასეთი თანამშრომელი რომ ჰყავს, ნეტავ, თუ იცის “ბაზისბანკმა”, – წერს თაკო გვაზავა.