მომხდარში ”ნაციონალური მოძრაობის” მოტივს ვხედავ, რადგან თუნდაც მათი მხარდამჭერებისთვის ეს ფაქტი გაზრდიდა “ქართული ოცნების” მიმართ საპროტესტო მუხტს, – ამის შესახებ ”ინტერპრესნიუსს” პოლიტოლოგმა და ექსპერტმა რამაზ საყვარელიძემ განუცხადა, რომელიც დეპუტატ გივი თარგამაძის ავტომანქანის აფეთქების ფაქტს გამოეხმაურა.
”გივი თარგამაძის ლიკვიდაცია რომც მომხდარიყო და საბედნიეროდ არ მოხდა, ეს ”ქართულ ოცნებას” მაინც არაფერს მისცემდა. არ არის გივი თარგამაძე ის ღერძი, რომლის გაუნებელყოფითაც ”ნაციონალურ მოძრაობას” რამე შეეცვლებოდა. ასე რომ, მე ვერ ვხედავ ”ქართული ოცნების” მოტივს, თუკი დავუშვებთ რომ ის არის ამის ინიციატორი. ”ნაციონალური მოძრაობის” მოტივს კი ვხედავ, რადგან თუნდაც მათი მხარდამჭერებისთვის ეს ფაქტი გაზრდიდა „ქართული ოცნების“ მიმართ საპროტეტსო მუხტს, მითუმეტეს, მოხდა აფეთქება, რომელშიც გივი თარგამაძე არ დაზიანებულა,” – განაცხადა რამაზ საყვარელიძემ.
ამასთან, პოლიტოლოგი ეჭვობს, რომ შესაძლოა აფეთქების შესახებ თავად გივი თარგამაძეს სცოდნოდა, რისი თქმის საფუძველსაც, მისი განმარტებით, თარგამაძის არაადეკვატური რეაქცია აძლევს.
”რომ არ სცოდნოდა, მაშინ გივი თარგამაძე სხვანაირად მოიქცეოდა. გივი თარგამაძის რეაქცია არ იყო ადეკვატური. ის ძალიან მშვიდი იყო და არ ეტყობოდა შოკში ჩავარდნა,” – განაცხადა რამაზ საყვარელიძემ.
გუშინ, ”პირიმზესთან“, ”ერთიანი ნაციონალური მოძრაობის“ ერთ-ერთი ლიდერის გივი თარგამაძის ავტომანქანა აფეთქდა. მანქანაში იმყოფებოდა თარგამაძე და მისი მძღოლი. დაშავებულია 4 პირი.
შინაგან საქმეთა სამინისტროს ინფორმაციით, მომხდარი ფაქტზე გამოძიება სისხლის სამართლის კოდექსის 19-109-ე მუხლით დაიწყო, რაც დამამძიმებელ გარემოებაში განზრახ მკვლელობის მცდელობას გულისხმობს.
www.ipn.ge