საპარლამენტო უმრავლესობის წევრი გოგლა ჟვანია „რეპორტიორის” პრესკლუბში გამართულ ბრიფინგზე ზურაბ ჟვანიას საქმესთან დაკავშირებით ისაუბრა და განაცხადა, რომ მიხეილ სააკაშვილის განცხადებები აღნიშნულ საქმესთან დაკავშირებით ეჭვებს უჩენს.
ჟვანიამ ასევე აღნიშნა, რომ ოდესის გუბერნატორი საქართველოში ნამდვილად დაბრუნდება და ყველა ჩადენილ დანაშაულზე პასუხს აგებს.
„სააკაშვილის განცხადებები არის ვირტუალი სამყაროდან ამომავალი, რომელშიც ცხოვრობს. მისი განცხადებები დაფუძნებულია მის შიშებზე და მისწრაფებებზე. „ქართული ოცნების” მხრიდან ზურაბ ჟვანიას საქმის წინ წამოწევა საარჩევნოდ, ხედავთ, რომ არ ყოფილა, რადგან მიმდინარეობს გამოძიება, ეს არასდროს ყოფილა ჩვენი მხრიდან პოლიტიკური მსჯელობის საგანი. რაც შეეხება ფაქტს, რომ მიხეილ სააკაშვილი ხშირად უბრუნდება ზურაბ ჟვანიას საქმეს და დაძაბულია, მიჩენს ეჭვებს სხვა ფაქტებთან და გარემოებებთან ერთად – ცნობილი მოვლენაა, დამნაშავე ადამიანები უბრუნდებიან დანაშაულის ადგილს. უბრუნდებიან ერთადერთი მიზეზით – მოსვენებას არ აძლევთ მათ მიერ ჩადენილი დანაშაული, ეშინიათ, რომ ვინმე არ მოიძიოს და არ დაადგინოს, რომ რაღაც ვერ მიჩქმალეს დანაშაულის ჩადენის შემდეგ. ასეთ ასოციაციებს მიჩენს სააკაშვილის პერმანენტული მიბრუნება ამ თემის მიმართ. ერთი რამ ვიცი – სააკაშვილს ძალიან ბევრ დანაშაულზე მოუწევს პასუხისგება, რომელიც მას აქვს ჩადენილი. სააკაშვილი საქართველოში ბორკილებით ნამდვილად ჩამოვა”,- განაცხადა ჟვანიამ.