საქართველო ევროპასა და ამერიკაში იქნება პირველი ქვეყანა, რომელიც კოვიდგამოჯანმრთელებულ პაციენტებს ამბულატორიული კვლევის უფასო პროგრამას შესთავაზებს, – ამის შესახებ ჟურნალისტებს ინფექციური საავადმყოფოს გენერალურმა დირექტორმა, თენგიზ ცერცვაძემ განუცხადა.
„ჩვენი კვლევა იქნება პირველი მსგავსი კვლევა. დაახლოებით 400-500 კაცს ვიკვლევთ და მათში ყველა გართულებას შევისწავლით, არა მარტო ჰოსპიტალიზებულ ავადმყოფებში, არამედ ბინაზე ვინც მკურნალობდა. კვლევა ჩატარდება ინფექციური კლინიკის ბაზაზე, თუმცა მასში ყველა მიმართულების ექიმები იქნებიან ჩართულები, მათ შორის – მოწვეულებიც.
კვლევა შერჩევით ჩატარდება. კომპიუტერულად შევარჩევთ შემთხვევითობის პრინციპით. ამ კვლევის შედეგად ძალიან დიდი სიზუსტით დაიდება შედეგები, თუ რამდენ პროცენტს უნვითარდება გართულება. საინტერესოა, ჩვენთან რა შედეგი გვექნება. გარდა ამისა, დადგინდება რომელი გართულება, რა სიხშირით უნვითარდებათ, ეს არის არსებულის გამწვავება, თუ ვირუსით გამოწვეული. ეს არის აქტუალობით მესამე საკითხი.
კოვიდი დამთავრდება. ვაქცინაციით დავამარცხებთ და შემდეგ შეიძლება ასობით ათასი კოვიდ გადატანილი პაციენტი დარჩეს და ეს იყოს სერიოზული პრობლემა. ახლა ჩვენი სამინისტრო მუშაობს პროექტზე, რომლის თანახმად გარდა კვლევისა, სპეციალური ამბულატორიული პროგრამა შეიქნება. მაგალითად, როგორიც არის შიდსისა და ტუბერკულიოზის პროგრამები. შედეგად, ყველა კოვიდგადატანილ ავადმყოფს საშუალება ექნება, მიმართოს კლინიკას და უფასოდ ჩაიტაროს გამოკვლევები. ეს ევროპასა და ამერიკაში პირველი პრეცენდენტი იქნება. მსგავსი პროგრამა კოვოდგადატანილებისთვის არავის აქვს“, – განაცხადა ცერცვაძემ.