პარლამენტის თავმჯდომარემ ბიუროს სხდომაზე ეპიდვითარებაზე ისაუბრა. არჩილ თალაკვაძემ შეზღუდვების შემსუბუქების მნიშვნელობაზე გაამახვილა ყურადღება.
მისი თქმით, ამ ეტაპზე კორონავირუსის გავრცელების საწინააღმდეგო წესების დაცვა აუცილებელია, რათა დადებითი დინამიკა შენარჩუნდეს.
„მსურს მხარი დავუჭირო პრემიერ-მინისტრის იმ მოწოდებას, რომ რეგულაციების შემსუბუქებასთან ერთად აუცილებელია ზედმიწევნით და დიდი პასუხისმგებლობით დავიცვათ უსაფრთხოების წესები, რომელთა დაცვისკენ ჯანდაცვის სამსახურები მოგვიწოდებენ. ეს არის იმის მთავარი პირობა, რომ არ მივიღოთ ეპიდემიოლოგიური ვითარების გაუარესება და კვლავ არ მოგვიხდეს შეზღუდვების დაწესება ჩვენს ეკონომიკასა და სოციალურ ცხოვრებაზე და თანმიმდევრულად მოვემზადოთ გეგმისთვის, რომელიც ეკონომიკის სრულ გახსნასთან დაკავშირებით გვქონდა“, – განაცხადა თალაკვაძემ.