ქართული კრიმინალური ქსელის წინააღმდეგ ევროპის მასშტაბით განხორციელებული სპეცოპერაციის შედეგად საქართველოს ორი მოქალაქე დააკავეს. 58 წლის კახაბერ ალშიბაია და 43 წლის გიორგი ბიგვავა ზუგდიდელები არიან.
58 წლის კახაბერ ალშიბაია საფრანგეთში დააკავეს. იგი ცნობილია, როგორც ,,კახა ზუგდიდსკი“. მისი დაკავების შესახებ ოჯახმა მედიის საშუალებით შეიტყო.
ე. წ. კანონიერი ქურდის სახლი ზუგდიდში, სოხუმის ქუჩაზე მდებარეობს. მას მოხუცი დედა ჰყავს. როგორც ოჯახის ახლობელი გვიყვება, დედას შვილი 20 წელია, არ უნახავს. რაც შეეხება მის ბრალეულობას, ოჯახის ახლობელი ალშიბაიას უდანაშაულოდ თვლის.
,,კახა არანაირად არ იქნება გარეული ამ ამბავში, მას მძიმე დაავადება აქვს, კერძოდ, ხერხემლის ძვლის სიმსივნე. ცალი ფეხი აქვს მოკლე და გადაადგილება დამოუკიდებლად არ შეუძლია. რა ეტყობა ამ სახლს, რომ კახა რამეში იყო გარეული. მოდით სახლში, იატაკიც კი ჩამტვრეულია… ერთი თეთრი არ არის აქ მისი ნაშოვნი, ცხონებულმა იმედიმ მამამისმა დატოვა ყველაფერი. მას 2015 წელს მიუსაჯეს 10-წლიანი პატიმრობა, თუმცა, ციხეში არ ჩასვეს და პირობითი სასჯელით, ე.წ სამაჯურით გაათავისუფლეს. გუშინ მქონდა მასთან კომუნიკაცია და ის საავადმყოფოში ბიოქიმიის ჩასაატარებლად მიდიოდა, საკვებისა და სიგარეტის ფულს ოჯახი აქედან ვუგზავნიდით”, – აცხადებს ,,რეგიონულ კვირასთან” ოჯახის ახლობელი, მანანა ბაძაღუა.