ტელეკომპანია “მთავარი” არხის გენერალური დირექტორი ნიკა გვარამია სოციალურ ქსელში არხის თანამშრომლების პოზიციას და რესპუბლიკური პარტიის წევრებს შორის დაპირისპირების შესახებ წერს.
მისი თქმით, “მთავარი” არხი ამ ინციდენტს ამოწურულად მიიჩნევს.
“გუშინ, სოციალურ ქსელში, სამწუხარო ინციდენტი მოხდა მთავარ არხსა და რესპუბლიკური პარტიის ლიდერს, ბატონ დავით ბერძენიშვილს შორის.
ბატონი დავითიც გულმხურვალეა საკუთარი პარტიის პოზიციების დაცვაში და მეც – საკუთარი არხის და ჟურნალისტების ინტერესების. ეს აღმოჩნდა, ჩემი აზრით, ინციდენტის წინაპირობა. არ დავიწყებ მტყუან-მართლის გარჩევას, არც იმის გარჩევას, ქალბატონი ხათუნა სამნიძის გუშინ გამოთქმული პოზიცია რამდენად სწორად მიგვაჩნია (ამაზე გვაქვს ჩვენი აზრი, მისი დაფიქისრების უფლებასაცვერავინ წაგვართმევს, რაც ვქენით კიდეც ჩვენი სარედაქციო პოლიტიკის და შეფასების ფორმების ფარგლებში, კორექტულობის სრული დაცვით).
მნიშვნელობას მივანიჭებ მხოლოდ იმას, რომ ჩვენს არხს არაერთგზის დაუფიქსირებია საკუთარი უკიდურესად პოზიტიური დამოკიდებულება რესპუბლიკური პარტიის და მისი ლიდერების მიმართ და, რაც არ უნდა არ ვიზიარებდეთ მათ კონკრეტულ პოზიციას რომელიმე საკითხთან დაკავშირებით, ჩვენთვის ეს პარტია მუდმივად რჩება ქართული პოლიტიკის უმნიშვნელოვანეს და უნიკალურ ნაწილად.
მთავარი არხი ინციდენტს ამოწურულად მიიჩნევს, კვლავ რჩება საკუთარი კეთილგანწყობილი პოზიციის ერთგულად რესპუბლიკური პარტიის მიმართ და წარმატებებს უსურვებს მას.” – წერს ნიკა გვარამია.
შეგახსენებთ, რომ 10 თებერვლას “რესპუბლიკური პარტიის” წევრმა, ხათუნა სამნიძემ განაცხადა, რომ ის და თამარ კორძია მზად არიან პარლამენტში სამივე ჯერზე კენჭისყრაში მონაწილეობა მიიღონ, თუ “ქართული ოცნება” უბარიერო საარჩევნო სისტემას დაარეგისტრირებს.