ბადრი პატარკაციშვილის გარდაცვალებიდან 13 წელი გავიდა. ტელეიმედის დამფუძნებელი 52 წლის ასაკში, 2008 წელს ლონდონში, საკუთარ სახლში მოულოდნელად, გულის შეტევით გარდაიცვალა.
დღემდე მისი სიკვდილის გარემოებებთან დაკავშირებით ბევრი კითხვა არსებობს. 2018 წელს მთავარმა პროკურატურამ პატარკაციშვილის მკვლელობის მომზადების საქმესთან დაკავშირებით, ფარული ჩანაწერები გაავრცელა. საგამოძიებო მასალების მიხედვით, კონსტიტუციური უსაფრთხოების დეპარტამენტის ყოფილი მაღალჩინოსნები ბიზნესმენის მკვლელობას გეგმავდნენ, პატარკაციშვილის ლიკვიდაცია კი, მიხეილ სააკაშვილის მიერ იყო სანქცირებული.
რაც შეეხება ბადრი პატარკაციშვილის საქმიანობას, მის სახელს უკავშირდება მრავალი საქველმოქმედო პროექტი. თუმცა ერთ-ერთი ყველაზე მნიშვნელოვანი „ტელეიმედია“. ტელეკომპანია 7 ნოემბრის მოვლენების შემდეგ 2008 წელს მიისაკუთრეს და ის მფლობელებს ხელისუფლების ცვლილების შემდეგ, 2012 წელს დაუბრუნეს. ბადრი პატარკაციშვილი იყო ბიზნესმენთა ფედერაციის ხელმძღვანელი და ოლიმპიური კომიტეტის პრეზიდენტიც.
ამასთანავე, „პატარკაციშვილის საქველმოქმედო ფონდი“ ლეიკემიით დაავადებულ ბავშვებს ეხმარებოდა და მათ მკურნალობას აფინანსებდა. მის სახელს უკავშირდება ასევე ურეკის, ანუ „იმედის ქალაქის“ შექმნა, ისტორიული ძეგლებისა და მთაწმინდის პარკის რეაბილიტაცია, თბილისის ცირკის აღდგენა.