რამდენადაც მეტ დასაქმების ადგილს შექმნის პოტენციური ინვესტორი, ჩვენი მხრიდან იმდენად შეღავათიანი და მხარდამჭერი მიდგომა იქნება, – განაცხადა ეკონომიკისა და მდგრადი განვითარების მინისტრობის კანდიდატმა ნათია თურნავამ საქართველოს პარლამენტში კომიტეტების გაერთიანებულ მოსმენაზე სიტყვით გამოსვლისას.
მისი თქმით, უმუშევრობის მაჩვენებელი 0,9%-ითაა გაზრდილი და ამჟამად 18,5%-ს აღწევს.
„2020 წლის უმუშევრობის სტატისტიკა გამოქვეყნდა. გასაკვირი არ არის, რომ უმუშევრობა გაზრდილია და მაჩვენებელი გაუარესებულია. რასაკვირველია, უმუშევრობა მთელი მსოფლიოს პრობლემაა და პანდემიის შედეგია. 0,9%-ითაა უმუშევრობის მაჩვენებელი გაზრდილი და აღწევს 18,5%-ს. ეს არის უარესი, ვიდრე 2019 წელს, მაგრამ არ შემიძლია არ აღვნიშნო, რომ ბოლო 10-წლიან პერიოდში ეს ყველაზე დაბალი მაჩვენებელია. 2018 წელთან შედარებით მაჩვენებელი გაუმჯობესებულია. ზოგადად კი, თუ ავიღებთ 2010-2012 წლებს უმუშევრობის დონე 27-28%-ს აღწევდა, მასთან შედარებით 18% კატასტროფული მაჩვენებელი არ არის.
ნიშნავს ეს თუ არა, რომ დასაქმება ჩვენი პრიორიტეტი არ არის? – რა თქმა უნდა, არამცდაარამც! ჩვენი მთავარი პრიორიტეტი ახალი სამუშაო ადგილების შექმნაა“, – განაცხადა თურნავამ.
მისივე თქმით, 0,9%-ით უმუშევრობის ზრდის დაძლევა მიმდინარე წელს შეიძლება. მინისტრობის კანდიდატმა ისაუბრა, თუ როგორ გეგმავს სამინისტრო უმუშევროის შემცირებას. თურნავამ აღნიშნა, რომ ყველა მათ ეკონომიკურ პორგრამაში, „აწარმოე საქართველოში“ და სხვა სპროექტებში, წინაა წამოწეული დასაქმების ვალდებულება.
„იმდენად, რამდენადაც მეტ დასაქმების ადგილს შექმნის პოტენციური ინვესტორი, იმდნად შეღავათიანი და მხარდამჭერი მიდგომა იქნება ჩვენი მხრიდან. ეს პირდაპირ არის ასახული ჩვენს მოთხოვნებში“, – განაცხადა მინისტრობის კანდიდატმა.