ეს აქციები არცერთ შემთხვევაში არ არის ჩვენი პოლიტიკის მომავალი, ეს ცხადია. ადამიანები ამას კარგად ხედავენ. პოლიტიკური პრეფერენციები ამომრჩეველს როგორიც არ უნდა ჰქონდეს, მათ ეს აქციების ფორმა და ბევრი მოთხოვნა, რომელსაც ოპოზიცია აყენებს, მაინცდამაინც დიდად არ მოსწონთ, – ამის შესახებ პარლამენტის ადამიანის უფლებათა დაცვის კომიტეტის თავმჯდომარე მიხეილ სარჯველაძემ „დღის ქრონიკაში“ განაცხადა.
მისი თქმით, მიმდინარე აქციები მხოლოდ ერთი ახირებული პოლიტიკური ჯგუფის მიზნებს ემსახურება.
„იმ ელექტორატსაც კი, რომელიც ნეგატიურად იყო განწყობილი ხელისუფლების მიმართ და ოპოზიციის მხარდამჭერი იყო 31 ოქტომბრის არჩევნებზე, რეალურად მათი დამოკიდებულებაც კი არ არის თანხვედრაში ამ აქციების ორგანიზებასთან, რომელსაც ახლა ვხედავთ. ეს ფაქტია და შეუიარაღებელი თვალითაც ჩანს. მეც არ მიყვარს საუბარი იმაზე, რამდენი ხალხი იყო, ეს არაფერს ცვლის. ის რომ დიდი სახალხო მღელვარება და დაუმორჩილებლობისკენ მოწოდებებს საფუძველი არ გააჩნია ეს იმთავითვე ცალსახაა. ჩემი მიდგომა ასეთი, რომ ერთი ადამიანი მაინც თუ აპროტესტებს რაღაცას, ბუნებრივია ამას ანგარიში უნდა გავუწიოთ. ეს ნორმალურია, სწორია, მაგრამ ეს არ ნიშნავს იმას, რომ ამის გამო რაღაც კატაკლიზმები მოხდება და ტექტონიკური ცვლილებები ვიხილოთ სახელმწიფოში. ეს არ იქნება სწორი. რეალურად ეს არ არის იმის მცდელობა, რომ რაიმე არგუმენტი გააგებინონ ხელისუფლებას, რომელიც აქამდე არ ესმის. ეს არის ცივილიზებულ სამყაროში აქციების მიზანი, რომ ხელისუფლებას ყურადღება მიიქციონ, რაღაც არგუმენტთან დაკავშირებით. ან პროტესტი გამოხატონ მიღებული გადაწყვეტილების უსწორობასთან დაკავშირებით. აქ არც ერთი გვაქვს და არც მეორე. ეს არ არის ნორმალური პროცესი. აქ არის ახირებული პოლიტიკური ჯგუფი, რომელსაც სურს ამღვრიოს წყალი იმისთვის, რომ ხელში ჩაიგდოს ძალაუფლება და მზად არის ამისთვის გაწიროს ქვეყნის სტაბილურობა, ამ მძიმე პერიოდშიც კი, რომელშიც ვიმყოფებით“, – განაცხადა სარჯველაძემ.