სამწუხაროდ, საქართველოშო არსებული პოლიტიკური ვითარება სერიოზულ შეშფოთებას იწვევს მზარდი პოლარიზაციის გამო, ახლა მნიშვნელოვანია, ყველა პარტიამ ყველაფერი გააკეთოს, რომ მოხდეს სიტუაციის დეესკალაცია, ერთად მივიდნენ საერთო აზრამდე, – ამის შესახებ ევროპარლამენტის პლენარულ სესიაზე, საქართველოს შესახებ მომხსენებელმა, საგარეო და უსაფრთხოების საკითხებში ევროკავშირის უმაღლესმა წარმომადგენელმა ჟოზეფ ბორელმა განაცხადა.
მისივე თქმით, ყველა მხარემ ხელი უნდა შეუწყოს კომპრომისის მიღწევას.
„საქართველო ევროკავშირის წამყვან ასოცირებულ პარტნიორად რჩება. ჩვენ საქართველოსთან ამბიციური ასოცირების შეთანხმება გვაქვს. სამწუხაროდ, ქვეყანაში არსებული პოლიტიკური სიტუაცია სერიოზულ შეშფოთებას იწვევს მზარდი პოლარიზაციის გამო. სიტუაცია რისკს უქმნის საქართველოს დემოკრატიას. მე ვიმეორებ ჩვენს მყარ შეხედულებას, რომ ახლა მნიშვნელოვანია, ყველა პარტიამ ყველაფერი გააკეთოს, რომ მოხდეს სიტუაციის დეესკალაცია, ერთად მივიდნენ საერთო აზრამდე. ევროპული საბჭოს პრეზიდნტი ახლახანს იყო საქართველოში და ჰქონდა შესაძლებლობა, შეხვედროდა პრეზიდენტს, პრემიერსა და ოპოზიციას. ის ჩართული იყო პოლიტიკურ პარტიებს შორის მოლაპარაკებაში. უკან დაბრუნებელმა კი მან გამოაცხადა, რომ ბატონი კრისტიან დეინელსონი ჩართული იქნება ევროკავშირის მიერ მხარდაჭერილი მედიაციის პროცესში. ჩვენ ველოდებით ქართული პარტიების პროგრესს ამ დიალოგში. დავაკვირდებით ამ პროცესს.
საქართველოში ევროკავშირის დელეგაციის ხელმძღვანელი ასევე შეუწყობს ხელს ამ მედიაციის ძალისხმევას. ყველა მხარემ ხელი უნდა შეუწყოს კომპრომისის მიღწევას. ჩვენ ველოდებით, რომ მთავრობა უზრუნველყოფს ინკლუზიურ ლიდერობას და ქართველი ხალხის ინეტერსებს პირველ ადგილზე დააყენებს. ყველა აქტორმა თავი უნდა შეიკავოს პროვოკაციული ქმედებებისა და რიტორიკისგან“, – განაცხადა ჟოზეფ ბორელმა.