სახალხო დამცველი მედიაჰოლდინგ ,,კვირას” ჟურნალისტებზე თავდასხმის ფაქტს ერთი თვის შემდეგ ეხმაურება. როგორც ომბუდსმენის მიერ გამოგზავნილ ტექსტშია აღნიშნული, მან ფაქტის შესახებ ინფორმაცია მხოლოდ შეიტყო და სხვა არაფრის გაკეთება ამ ეტაპზე არ შეუძლია.
ომბუდსმენმა ჟურნალისტებზე თავდასხმის საქმეზე წარმოება ისე დაასრულა, რომ, რეალურად, არც დაუწყია.
,,ყოველივე აღნიშნულის გათვალისწინებით, კანონმდებლობით მინიჭებული უფლებამოსილების ფარგლებში, სახალხო დამცველის აპარატი მოკლებულია თქვენს განცხადებაზე სხვაგვარი რეაგირების განხორციელების შესაძლებლობას და ასრულებს წარმოებას N1704/21 საქმეზე”, – ნათქვამია სახალხო დამცველის წერილში.
,,კვირას” ჟურნალისტებს თავს 16 თებერვალს დაესხნენ. მაშინვე ვცადეთ ომბუდსმენთან დაკავშირება, რადგან სახალხო დამცველის მოვალეობაში მედიის წარმომადგენლების მხადაჭერაც შედის, განსაკუთრებით – მაშინ, როდესაც სახეზე არიან დაზარალებულები. სახალხო დამცველმა ფაქტის გახმაურების შემდეგაც არ გააკეთა კომენტარი, არც ჩვენს ზარებს უპასუხა, წერილიც გავუგზავნეთ, თუმცა, 16 თებერვლის ფაქტზე რეაგირება დღეს, 23 მარტს მოხდა.
ცნობისთვის, 16 თებერვალს ჭიათურაში მედიაჰოლდინგ “კვირას” გადამღებ ჯგუფს არაფხიზელ მდგომარეობაში მყოფი პირები თავს დაესხნენ. ჟურნალისტებს მიაყენეს ფიზიკური შეურაცხყოფა და ტექნიკა დაუზიანეს.
