სირიის ჩრდილო-აღმოსავლეთში მდებარე ალ-ჰოლის ლტოლვილთა ბანაკში ქურთმა სამხედროებმა ე.წ. ისლამური სახელმწიფოს სავარაუდო მხარდამჭერები დააკავეს. ინფორმაციას „დოიჩე ველე“ ავრცელებს.
აშშ-ისგან მხარდაჭერილი „სირიის დემოკრატიული ძალების“ ინფორმაციით, რეიდის დროს ცხრა ადამიანია დაკავებული, მათ შორის, ე.წ. ისლამური სახელმწიფოს რეკრუტერი, აბუ საად ალ-ერაყი.
მიმდინარე წლის დასაწყისიდან ბანაკის ტერიტორიაზე, სადაც 60 000-მდე ადამიანი ცხოვრობს, რადიკალი ისლამისტების მომხრეებმა 50-მდე ადამიანი მოკლეს. ქურთი მებრძოლების მტკიცებით, რეიდის მიზანი ჯიჰადისტების საქმიანობის აღკვეთა იყო.
გაერო-ს ანგარიშში აღნიშნულია, რომ ბანაკის ტერიტორიაზე რადიკალიზაცია, ფულის შეგროვება, წვრთნა და გარე ოპერაციების წახალისება შეიმჩნევა.
კომენტარები