ციხის შიში დაძლია არა ნიკა მელიამ, არამედ „ქართულმა ოცნებამ“, ციხეებში ადამიანებს აღარ აწამებენ და არაადამიანურად აღარ ეპყრობიან, – ამის შესახებ საპარლამენტო უმრავლესობის წევრმა, ალუდა ღუდუშაურმა განაცხადა, რითაც საქართველოს ყოფილი პრეზიდენტის, მიხეილ სააკაშვილის განცხადებას გამოეხმაურა.
მისივე თქმით, ციხე არის ის „აქილევსის ქუსლი“, რომლის გამოც „ნაციონალური მოძრაობა“ ჩამოიშალა.
„მიხეილ სააკაშვილის განცხადება, რომ თურმე ნიკა მელიას ციხის შიში დაუძლევია, ამოვარდნილია ყოველგვარი კონტექსტიდან. ის ტყუილებით კვებავს საკუთარ ვიწრო აგრესიულ ჯგუფს, რომელსაც ეუბნება, რომ ხან პარლამენტში უნდა შევიდეს, ხან კარავში. ციხის შიში დაძლია არა ნიკა მელიამ, არამედ „ქართულმა ოცნებამ“. როდესაც ჩვენ მოვედით ხელისუფლებაში, ციხე გავათავისუფლეთ იმისგან, რომ ადამიანების წამება, არაადამიანური მოპყრობა ციხეებში აღარ ხდება. ციხეში ადამიანებს ექცევიან ნორმალურად, ისე, როგორც ნებისმიერ ევროპულ ქვეყანაში. ამიტომ, როდესაც მიხეილ სააკაშვილი საუბრობს ციხესა და შიშზე, ეს არის მისი თანმდევი შედეგი. შიში რომ არ ჰქონდეს მას, აქამდე ჩამოვიდოდა და მართლმსაჯულების წინაშე წარდგებოდა. თუ მას მართლაც აქვს საკუთარი სიმართლე დასამტკიცებელი, სასამართლოზე დაამტკიცებდა და არ შეეშინდებოდა, არ დაიმალებოდა და არ გაიქცეოდა ქვეყნიდან. მათ ადგილზე ციხის ხსენებას მოვერიდებოდი. ციხე არის ის „აქილევსის ქუსლი“, რომელის გამოც „ნაციონალური მოძრაობა“ ჩამოიშალა და დაინგრა. მათ გადააქციეს ციხე სასაკლაოდ. ამიტომ მიხეილ სააკაშვილის ეს განცხადება მორიგ ჯერზე ადასტურებს იმას, რომ, როგორც ჩანს, მას წარმოუდგენია, რომ ციხე უნდა იყოს ადამიანებისთვის წამების და არაადამიანური მოპყრობის ადგილი. მე მას ვურჩევდი, რომ ციხის და შიშის ხსენებაზე ორივე შემთხვევაში საკუთარ თავში ჩაიხედოს“, – განაცხადა ალუდა ღუდუშაურმა.