ლევან იზორია – სამი პირი უკანონოდ შეიჭრა სასწავლო ცენტრში და გუშაგი ნორმების დაცვით მოიქცა

თავდაცვის მინისტრი, ლევან იზორია წვრთნებისა და სამხედრო განათლების ცენტრ „კრწანისში“ მომხდარ ინციდენტს ეხმაურება და განმარტავს, რომ სამი პირი სასწავლო ცენტრში უკანონოდ შეიჭრა და გუშაგი აბსოლუტურად ნორმების დაცვით მოიქცა.
როგორც ჟურნალისტებს მინისტრმა განუცხადა, შემთხვევის ადგილიდან დაახლოებით 100 მეტრში იარაღი აღმოაჩინეს, რომელიც მათ ეკუთვნოდათ.
„სამი პიროვნება ცდილობდა უკანონოდ შეჭრილიყო ცენტრის ტერიტორიაზე, რასაც მოჰყვა კანონიერი რეაგირება გუშაგისგან. კერძოდ, მან ჯერ სიტყვიერად გააფრთხილა, შემდეგ როდესაც უკვე თავდასხმის ფაქტს ჰქონდა ადგილი, ჰაერშიც გამაფრთხილებელი გასროლა განახორციელა, მაგრამ თავდასხმა კვლავ გრძელდებოდა და იღებდა საშიშ და აგრესიულ ხასიათს, რასაც მან ნორმების სრული დაცვით უპასუხა.
კიდევ ერთხელ ვადასტურებ, რომ დილით, 03:30 საათზე 3 პირი უკანონოდ შეიჭრა სასწავლო ცენტში, რომელიც დაცულია და გუშაგი მოიქცა აბსოლუტურად ნორმების დაცვით. გამოძიება გრძელდება. მიმდინარეობს იმ ორი თანმხლები პირის დადგენაც. შემთხვევის ადგილიდან, დაახლოებით 100 მეტრში, ნაპოვნი იქნა მობილური ტელეფონი და პისტოლეტი“, – აღნიშნა ლევან იზორიამ.