2011 წელს ჯაშუშობის საქმეზე დაკავებული გია გორელაშვილი საქალაქო სასამართლოში ამ წუთებში მოწმის სტატუსით ჩვენებას აძლევს სასამართლოს.
მოწმე იკითხება ჯაშუშობის საქმეზე დაკავებული პირების წამების საქმეზე, რა დროსაც სერგო თეთრაძე, დავით ლონდარიძე და სერგო ჩაპლიგინი დააკავეს. გორელაშვილის განცხადებით, მის სახლში ჩხრეკა ჩაატარეს საჩხედრო პოლიციის თანამშრომლებმა. თავდაცვის სამინისტროში გადაყვანისას კი მოსთხოვეს ეღიარებინა, რომ იცნობდა თეთრაძეს, ლონდარიძეს და ჩაპლიგინს.
“თავდაცვის სამინისტროში რომ მიმიყვანეს, იმ ოთახში იყო თითქმის ყველა, ვინც ჩემს სახლში ჩხრეკაზე იყვნენ შემოსულები, ლევან ზაქრაძე, ნიკა ძიმცეიშვილი, ზურაბ გოგიჩაიშვილი და ირაკლი გრძელიშვილი. მეგის ქარდავაც იყო ოთახში, რომელიც მირტყამდა. მერე ის გავიდა და შემოვიდა გიგი კალანდაძე, ხის ხელკეტი ეჭირა, ბოლოში ბურთივით მრგვალი დაბოლოებით და ეკლიანი იყო. მითხრა არ გაინძრე თორე ცუდ ადგილას მოგხვდებაო და ეს ხელკეტი დამარტყა უკან რამდენჯერმე. შემდეგ გავიდა კალანდაძე და შემოდის მეგის ქარდავა. ჩამომაცვა “ცელოფნის” პარკი თავზე და მოუჭირა. ქარდავამ და კალანდაძემ გაიმეორეს, შენ იცი ვინ გველოდებაო, იცი რომ გვჭედავო და საქმეს აფუჭებო”, – აცხადებს გორელაშვილი.
გორელაშვილის ინფორმაციით, მას ქარდავა მოკვლით დაემუქრა. ასევე მან სხდომაზე მოყვა, რომ მათთვის შეფარდებული წინასწარი პატომრობის დროს პირველად ნახა სერგო თეთრაძე, რომელსაც სახეზე ცემის კვალი ეტყობოდა. გორელაშვილმა ასევე მოყვა, როგორ მიმდინარეობდა მისი ცემა საპყრობილეში, ალექსანდრე მუხაძის კაბინეტში. ასევე ესმოდა როგორ სცემდნენ სერგო თეთრაძეს.
ამ საქმეზე ბაჩო ახალაიას გამოძიება წამების ორგანიზებას ედავება. ახალაიასთან ერთად ბრალდებულები არიან მეგის ქარდავა და ნიკოლოზ ძიმცეიშვილი, რომელთა საქმეც ცალკე ეპიზოდად არის გამოყოფილი.