რუსთავში გახსნილი ”112”-ის ცენტრის მიზანია თბილისის ”112”-ის განტვირთვა და მისი დაზღვევა, – ამის შესახებ საქართველოს შინაგან საქმეთა მინისტრმა გიორგი მღებრიშვილმა რუსთავში განაცხადა, სადაც შსს-ს „112“-ის ახალი ცენტრი გაიხსნა.
მისივე თქმით, ორივე ცენტრი ერთდროულად, პარალელურ რეჟიმში იმუშავებს და მთელი საქართველოს მასშტაბით, 24 საათის განმავლობაში მიიღებს ზარებს.
”დღეს თქვენთან ერთად კიდევ ერთ ნაბიჯს ვდგამთ ჩვენი ქვეყნის და მოსახლეობის უსაფრთხოების დაცვისთვის.
შინაგან საქმეთა სამინისტროს მუშაობის პრიორიტეტი ტექნოლოგიური გარდაქმის გზით სისტემის არსებითი რეფორმირებაა. ამ მიზნით უკვე გავხსენით ერთობლივი ოპერაციების ცენტრი, რომელიც საგრძნობლად გააუმჯობესებს ქვეყნის უსაფრთხოების სისტემას.
იმისთვის, რომ ნებისმიერ გამოწვევაზე სახელმწიფოს რეაგირების სტანდარტი იყოს უფრო მაღალი, დღეს უკვე ამ ახალ შენობაში, რუსთავში, მუშაობას იწყებს გადაუდებელი დახმარების ოპერატიული მართვის ალტერნატიული ცენტრი. ეს იმას ნიშნავს, რომ შინაგან საქმეთა სამინისტრო, ”112” კიდევ უფრო ძლიერდება”, -განაცხადა გიორგი მღებრიშვილმა.
როგორც შს მინისტრმა აღნიშნა, ”112”-ს საზოგადოებრივი უსაფრთხოების სისტემაში უმნიშვნელოვანესი როლი აკისრია.
”ის წარმოადგენს დამაკავშირებელ ხიდს ყველაზე მძიმე წუთებში მყოფ მოქალაქესა და საგანგებო სამშველო სამსახურებს შორის.
შსს-ს ეს დანაყოფი სტრატეგიული მნიშვნელობის ობიექტს წარმოადგენს, შესაბამისად, მისი გამართული და უწყვეტი ფუნქციონირება სახელმწიფოსთვის უაღრესად მნიშვნელოვანია.
სწორედ ამიტომ შეიქმნა ეს უახლესი ტექნოლოგიებით აღჭურვილი ცენტრი, რომლის მიზანი თბილისის ”112”-ის განტვირთვა და მისი დაზღვევაა. ორივე ცენტრი ერთდროულად, პარალელურ რეჟიმში იმუშავებს და მთელი საქართველოს მასშტაბით ის მიიღებს ზარებს 24 საათის განმავლობაში”, -განაცხადა მღებრიშვილმა.
რუსთავში, დღეს შსს-ს „112“-ის ახალი ცენტრი გაიხსნა. ღონისძიებას პრემიერ-მინისტრი გიორგი კვირიკაშვილი და შინაგან საქმეთა მინისტრი გიორგი მღებრიშვილი, საქართველოს მთავრობის წევრები, საერთაშორისო ორგანიზაციების, კერძო და არასამთავრობო სექტორის წარმომადგენლები დაესწრნენ.