რუსთავის გადაუდებელი დახმარების ოპერატიული ცენტრი კიდევ ერთი დამატებითი ობიექტი იქნება, რომელიც 24-საათიან რეჟიმში იმუშავებს ჩვენი ქვეყნის მოქალაქეების უსაფრთხოების დასაცავად, – ამის შესახებ საქართველოს პრემიერ-მინისტრმა გიორგი კვირიკაშვილმა რუსთავში განაცხადა, სადაც მან შინაგან საქმეთა მინისტრ გიორგი მღებრიშვილთან ერთად შსს-ს „112“-ის ახალი ცენტრი გაიხსნა.
„დარწმუნებული ვარ, რომ ორივე ცენტრის პარალელური გამართული მუშაობა კიდევ უფრო ეფექტიანი იქნება და უზრუნველყოფს თითოეული ჩვენი მოქალაქის უსაფრთხოებას და ჩვენ დარწმუნებულები ვართ, რომ აქ მაღალი პროფესიონალიზმის მქონე ადამიანები მუშაობენ“, – განაცხადა კვირიკაშვილმა.
მისივე თქმით, შსს-ს „112“-ის დეპარტამენტი არის ქვეყნის მასშტაბით მოქმედი ერთიანი სამსახური, რომელიც გადაუდებელი შემთხვევების შესახებ პირველი იგებს ინფორმაციას მოქალაქეებისგან.
„ჩვენ ვიცით, რომ ფორსმაჟორულ ვითარებაში ყველა წამი არის გადამწყვეტი და ყოველთვის უნდა ვიყოთ მზად კვალიფიციური დახმარებისთვის. ჩვენ ყველაფერს ვაკეთებთ იმისთვის, რომ დაცული იყოს თითოეული ადამიანის უსაფრთხოება და მუდმივად ვითვალისწინებთ მსოფლიოს საუკეთესო პრაქტიკას. მივესალმები, რომ არსებობს სპეციალური არხები და დაკავშირების სპეციალური ფორმატები განსაკუთრებული საჭიროების მქონე ადამიანებისთვის. რუსთავის გადაუდებელი დახმარების ოპერატიული ცენტრი კიდევ ერთი დამატებითი ობიექტი იქნება, რომელიც 24-საათიან რეჟიმში იმუშავებს ჩვენი ქვეყნის მოქალაქეების უსაფრთხოების დასაცავად“, – განაცხადა კვირიკაშვილმა.
პრემიერ-მინისტრის თქმით, აღნიშნულ შენობაში ფუნქციონირებას იწყებს სასწავლო ცენტრი, რომელიც 112-ის თანამშრომლების გადამზადებას უზრუნველყოფს და ნებისმიერი მოქალაქე, რომელსაც სურვილი ექნება გახდეს 112-ის გუნდის წევრი, შეძლებს ამ სპეციფიკური განათლების რუსთავის ცენტრში მიღებას.
კვირიკაშვილის განცხადებით, სწორედ ასეთი პროექტებით არის შესაძლებელი ქვეყნის სტაბილური და სწრაფი განვითარება.
როგორც მთავრობის მეთაურმა აღნიშნა, შსს-მ ბოლო პერიოდში უმოკლეს დროში განახორციელა რამდენიმე მნიშვნელოვანი ინოვაციური პროექტი.
„ყველა მაღალტექნოლოგიური პროექტი, რომელსაც ჩვენი ხელისუფლება ახორციელებს სახელმწიფო სერვისების განვითარებისთვის ემსახურება ჩვენი მოქალაქეების ინტერესებს. ეს პროექტები მსოფლიოში საუკეთესო სერვისების შორისაა და ჩვენ შეგვიძლია ამით დამსახურებულად ვიამაყოთ“, – განაცხადა კვირიკაშვილმა.
მისივე თქმით, რუსთავის 112-ის ცენტრის პროექტი იმითაც არის მნიშვნელოვანია, რომ იგი განხორციელდა ქვემო ქართლის რეგიონში, სადაც 175 ადამიანი დასაქმდება.