TV პირველის გარდაცვლილ ოპერატორზე, ლექსო ლაშქარავაზე ძალადობის ბრალდებით კიდევ ერთ პირს, გია გიგუაშვილს წინასწარი პატიმრობა შეეფარდა. ინფორმაცია ტაბულას თბილისის საქალაქო სასამართლოში დაუდასტურეს.
პროკურატურის ინფორმაციით, 5 ივლისს გიგუაშვილი და მასთან ერთად მყოფი ჯგუფურ ძალადობაში მონაწილე პირები ჟურნალისტურ საქმიანობაში ხელის შეშლის მიზნით და შეუწყნარებლობის მოტივით, თავს დაესხნენ ლაშქარავას. კერძოდ, ბრალდებული მასთან ერთად მყოფ მოძალადეებთან ერთად ლაშქარავას ფიზიკური ძალადობით და სიტყვიერი შეურაცხყოფით პროფესიული საქმიანობის შეწყვეტას აიძულებდნენ, რათა მას არ გადაეღო და გაევრცელებინა აგრესიული ქმედებები.
გიგუაშვილს ბრალდება საქართველოს სისხლის სამართლის კოდექსის 154-ე მუხლის მეორე ნაწილით (ჟურნალისტისათვის პროფესიულ საქმიანობაში უკანონოდ ხელის შეშლა, ჩადენილი ძალადობის მუქარით), 156-ე მუხლის მე-2 ნაწილის “ა” ქვეპუნქტით (ადამიანის დევნა პროფესიულ მოღვაწეობასთან დაკავშირებით, ჩადენილი ძალადობით) და 225-ე მუხლის მეორე ნაწილით (ჯგუფურ ძალადობაში მონაწილეობა) წარედგინა.