ექიმი დავით გადელია სოციალურ ქსელში პოსტს აქვეყნებს, რომელსაც უცვლელად გთავაზობთ.
“ახლა თბილისის ერთ კლინიკას ლანძღავენ ფბ-ზე. სტანდარტული სიტუაციაა: ჭირისუფალს მოუკვდა ასაკიანი დედა კოვიდით და ექიმებს და ამ კლინიკას მკვლელებს ეძახის. რა თქმა უნდა იღებდა ვიდეოებს, მისი აზრით ნაკლოვანებების ამსახველს, რა თქმა უნდა იწუნებს მკურნალობის პროტოკოლებს – თავისი მოსაზრებები აქვს მკურნალობაზე (რა თქმა უნდა, არაა ექიმი პროფესიით) და რა თქმა უნდა ხალისით იზიარებს მის ნაწერს ბევრი ადამიანი- ვისაც ერთი სული აქვს ასეთი ლანძღვა გაიზიაროს! მოკლედ, ყველაფერი გატკეპნილი ბილიკითაა..
არანაირი დაცვა არ გვაქვს ექიმებს! ხვალ ჩვენს, ან რომელიმე სხვა კლინიკას გალანძღავენ, წივილ- კივილს მოაწყობენ კლინიკაში (რას დაეძებენ სხვა ავადმყოფს!), შეეცდებიან რაიმე დააზიანონ და ერთი რამე უთხარი!- ჭირისუფალია და ყველაფრის უფლება აქვს!! კიდევ იქით ვბედავთ ხმის ამოღებას!??..
არცერთ კანონში, არცერთ ფიცში, კაცობრიობის არსებობის მანძილზე არ წერია, რომ ექიმი გამოჯანმრთელების გარანტიას იძლევა! ექიმი ცდილობს თავისი და მეცნიერების იმ პერიოდის განვითარების შესაძლებლობის ფარგლებში. რა თქმა უნდა არის განსხვავება სხვადასხვა ექიმის შესაძლებლობას შორის, რა თქმა უნდა არის შეცდომებიც- არ არსებობს ყველაზე განთქმული ექიმი, რომელსაც შეცდომა არ დაუშვია! მაგრამ არავის, ვიმეორებ არავის არა აქვს უფლება შეურაცხყოფა მიაყენოს ექიმს ასე სახალხოდ, ცინიკურად…არც სხვა პროფესიის ადამიანს უნდა მიაყენო, ცხადია, მაგრად როცა ექიმს აყენებ შეურაცხყოფას, რამდენ სხვა პაციენტს უკარგავ ნდობას, უკლავ იმედს! თუ თვლი, რომ ექიმს შეეშალა, არსებობს სალიცენზიო საბჭოები, სადაც ჩემი აზრით ექიმის საწინააღმდეგოდ უფრო არიან განწყობილნი, ვიდრე დასაცავად; არსებობს სასამართლო ბოლოს და ბოლოს! მაგრამ გასდის ყველას… არავინ არ გასამართლებულა უბრალო ცილისწამების და შეურაცხყოფის გამო- მაინცდამაინც უნდა მოკლან ცემით ექიმი, რომ საქმე აღიძრას…
მივმართავ ყველას, მათაც ვისაც განსაკუთრებით სურს ბოჭორიშვილში მოხვედრა და განსაკუთრებით აქვს ჩვენი იმედი: ვერავითარ გარანტიას ვერც სხვა და მით უფრო, ვერც კოვიდ დაავადებულის გამოჯანმრთელებაზე ვერავის ვერ მივცემთ! ყოველთვის ფეხი-ფეხ მივყვებით მსოფლიოს საუკეთესო გამოცდილებას კოვიდის მკურნალობაზე, შესაბამისად ვიცავთ დამტკიცებულ პროტოკოლებს, მაგრამ ამის მიუხედავად არსებობს გამოუვალი მდგომარეობები, როცა ვერ ვშველით! ძალიან ბევრი ახლობლები დავკარგეთ თავადაც ამ ბრძოლაში ჩვენს ხელში, ჩვენ თვალწინ. ბავშვობის ძმაკაცს ვერ ვუშველე ჩვენს კლინიკაში! …
თუ რამე პრეტენზია გაქვთ- თქვენი ნებაა!- ვისა აქვს უფლება დაგიშალოთ, ცივილური წესით შეიტანეთ საჩივარი სადაც საჭიროდ ჩათვლით და მოგვეცით უფლება თანაბარ პირობებში დავიცვათ თავი- და არა ასე, ცუდ სტატუსზე დაგეშილი უსაქმურების წყევლა-კრულვის და ქოთქოთის აკომპანიმენტით.
თავს არ გაცოდებთ- ღმერთმა დამიფაროს, მაგრამ თქვენ თვითონ ხომ უნდა მიხვდეთ, რომ ექიმების ძალები, ენერგია უკვე წკიპზეა! კიდევ ორკესტრირებული ლანძღვა გვინდა!? გამოიჩინეთ მოქალაქეობრივი პოზიცია, ქართული წესის შესაბამისად შეიკავეთ თავი ჭირში და თუ თვლით, რომ სამედიცინო პერსონალი დამნაშავეა- იმოქმედეთ ცივილურად!”