ავსტრალიის მოქალაქე რაფაელ მურსაკულოვს შანაი ბრუკთან არ ჰქონია შემხებლობა, მისთვის პროკურატურის მიერ წაყენებული ბრალდება გამაოგნებელი იყო, არაფერი მტკიცდება არც მოწმეებით, არც ანძებით, – ამის შესახებ შანაი ბრუკის მკვლელობის საქმეზე დაკავებულის, რაფაელ მურსაკულოვის ადვოკატმა სოფიო გოგლიჩიძემ განაცხადა.
ადვოკატის თქმით, გავრცელდა ბევრი არასწორი ინფორმაცია და ხდება კონტექსტის დამახინჯება. ამასთან, აღნიშნა, რომ მისი დაცვის ქვეშ მყოფი მთელი დღის განმავლობაში სახლში იმყოფებოდა. როგორც სოფიო გოგლიჩიძემ განაცხადა, მურსაკულოვი დუმილის უფლებას იყენებს.
„ბრალი წარედგინა ოფიციალურად 179-ე მუხლის პირველი ნაწილით, 109-ე მუხლის პირველი ნაწილის „გ“ ქვეპუნქტით და მესამე ნაწილით. ის იყენებს დუმილის უფლებას და ამბობს, რომ ამ ადამიანთან არ ჰქონია შემხებლობა. მისთვის ეს გამაოგნებელი და დამრტყმელი იყო. ვერაფრით ვერ ხსნის ამას. ბუნებრივია, სადავოდ გავხდით გარკვეულ საკითხებს. არ იმყოფებოდა იმ ტერიტორიაზე და არ ჩანს კამერებში. იმ ტერიტორიაზე იყო ხოლმე, სადაც უწევდა. არაფერი მტკიცდება არც მოწმეებით, არც ანძებით. ბევრი არასწორი ინფორმაცია არის გავრცელებული, ხდება კონტექსტის დამახინჯება. მთელი დღე სახლში იყო და არსად საეჭვო ადგილზე არ გადაადგილდებოდა“, – განაცხადა სოფიო გოგლიჩიძემ.