“TV პირველში” პროკურატურის წარმომადგენლები შევიდნენ, – ამის შესახებ ინფორმაციას თავად ტელევიზია ავრცელებს.
საგამოძიებო უწყების წარმომადგენლები ტელევიზიაში იმის დასადგენად მოვიდნენ, როდის და ვის მიერ იქნა გამოგზავნილი ბმული, სადაც სუსი-ს საიდუმლო ფაილები იყო ატვირთული.
არხის საინფორმაციო სამსახურის ხელმძღვანელის, ნოდარ მელაძის თქმით, პროკურორი ტელევიზიაში წინასწარი შეთანხმებით მივიდა.
“როცა გამოკითხვაზე ვიყავით, მათ გვთხოვეს, აინტერესებდათ, რა სახით შემოვიდა ჩვენთან ბმული, სადაც ატვირთული იყო ის 58 000 ფაილი და სადაც უკანონო მოსმენების უმძიმესი რეალობა მღვდლების, მონაზვნების, სასულიერო პირების, პატრიარქის უახლოესი გარემოცვის საუბრების ჩანაწერებია ასახული. მოკლედ მათ აინტერესებთ, მთელი ამ უკანონობის კასკადი როგორ მოხვდა ჩვენთან. ჩვენ პროკურატურის წარმომადგენლებს ავუხსენით, რომ ეს ფაილები ჩვენთან კვირას, ფეისბუქის გზით მოხვდა, როცა “ნოდარ მელაძის შაბათის” ოფიციალურ ფეისბუქ გვერდზე შეტყობინება შემოვიდა შესაბამისი ბმულით. პროკურატურას აინტერესებდა ამ ყველაფრის ნახვა, რომ შეედგინათ ოქმი”- განაცხადა ნოდარ მელაძემ.