ექსპრეზიდენტ ზვიად გამსახურდიას ვაჟი, პოლონეთში საქართველოს პოლიციის ატაშე გიორგი გამსახურდია ხშირად ჩამოდის საქართველოში და კერძოდ, ქალაქ ზუგდიდშიც, სადაც მას ბევრი მეგობარი ჰყავს. მათ შორის არიან მამის, ექსპრეზიდენტ ზვიად გამსახურდიას თანამოაზრეები. გიორგი გამსახურდიამ წელს მთელი შვებულება, ანუ თითქმის მთელი საარჩევნო პერიოდი სწორედ ზუგდიდში გაატარა. ექსპრეზიდენტის ვაჟს ხელისუფლების მხარდაჭერისთვის ოპოზიციური პარტიები ხშირად აკრიტიკებენ. “ჩამოვდიოდი და მომავალშიც ჩამოვალ სამეგრელოში. ბევრს აქვს ყელში გაჩხერილი ჩემი აქ ყოფნა, თუმცა არავის ვუთანხმებ, მე, გიორგი გამსახურდია, როდის ვიქნები სამეგრელოში და როდის რას გავაკეთებ” – ამბობს გიორგი გამსახურდია. თუმცა, ოფიციალურად, ნებისმიერი ხელისუფლების დროს პოლიციელის მთავარ მოვალეობად სტაბილურობის დაცვას მიიჩნევს და დაბეჯითებით შეიძლება ითქვას, რომ ექსპრეზიდენტის ვაჟი, რომელიც პოლონეთის შინაგან საქმეთა მინისტრმა პოლონეთის პოლიციის წინაშე განსაკუთრებული
დამსახურებისთვის დააჯილდოვა, სტაბილურობის დაცვას მართლაც ყოველთვის ახერხებს. ამჯერად მას ქვეყნის ერთ-ერთი ყველაზე დაძაბული საარჩევნო კამპანიის შესახებ ვესაუბრეთ.
– ჩვენი საზოგადოება მოწმეა, როგორ რთულად წარიმართა საარჩევნო კამპანია. პრაქტიკულად, აღარ დარჩა სფერო, სადაც ბინძურმა პოლიტიკური მეთოდებმა არ შეაღწია, ეს კი საზოგადოების ნაწილს პესიმიზმს უჩენს. თავად როგორი განწყობა გაქვთ ამ არჩევნების მიმართ?
– მე მაქვს განწყობა, რომ ყველა შემთხვევაში შევინარჩუნო ჩემი ქვეყნის სტაბილურობა და არავის მივცე მისი დარღვევის უფლება. არ ვაპირებ, ქვეყნის არევის მადა ვინმეს დავუკმაყოფილო, მათ შორის – ისეთ სპეკულანტ ავანტიურისტებს, როგორიც “ნაციონალები” არიან. მათი დღის წესრიგი ყველამ ვიცით – ქვეყნის არევა ენატრებათ, მაგრამ სურვილი ერთია, შესაძლებლობა – მეორე. წუთითაც არ ვფიქრობ, რომ ისინი ამ სურვილს აისრულებენ. სულ ცოტა, ეს სურვილი მათ შესაძლებლობას აღარ ემთხვევა.
წლებია, საზოგადოებას ხელისუფლებაში თავიანთი დაბრუნების სპეკულანტურ განცხადებებს სჩრიან და რას მიაღწიეს?! მხოლოდ იმას, რომ მათი ოდიოზური და დემაგოგიური დაჯგუფება რეალური მხარდამჭერების გარეშე რჩება. მათი მომხრე ხალხიც, რა თქმა უნდა, არსებობს – ადამიანს პოლიტიკურ გემოვნებას ვერ აუკრძალავ, მაგრამ რამდენია ეს ხალხი? იმდენი, რომ მიტინგებზეც ვეღარ გროვდებიან. ადამიანი ვითარდება, იზრდება და ხედავს, ვინ ვინ არის.
ქართველებს ნიჭი არ გვაკლია და უკვე ყველამ მშვენივრად დაინახა, რას წარმოადგენს “ნაცმოძრაობა” და, მასთან ერთად, ოპოზიციის დიდი ნაწილი. დღეს მორალისაგან დაცლილ “ნაცმოძრაობასა” და მის დემაგოგიურ ლიდერს ვინღა ჩააბარებს ხელისუფლებას?! ჩვენ ვართ სახელმწიფო, თან – თავმოყვარე სახელმწიფო, რომელიც არ აპირებს დემაგოგიური ჯგუფის სურვილის განხორციელებას, მაგრამ თუკი მათ რამე გაბედეს, მაშინვე შესაბამის პასუხს მიიღებენ. ამ საკითხთან დაკავშირებით სხვა აზრი არც შეიძლება არსებობდეს.
– თუმცა, სადავო არ არის, რომ ხელისუფლებამ საზოგადოების კეთილდღეობას ვერ მიაღწია. ჩვენს ქვეყანაში სიღატაკე და მძიმე სოციალური მდგომარეობა მეფობს, რაც ქმნის კიდეც არეულობის საფუძველს…
– კი ბატონო, ამას მეც ვხედავ, თუმცა იმასაც ვიტყვი, რომ ჩვენს ხალხს უარესიც ბევრჯერ ჰქონია, მეც არანაკლები გადამიტანია, მაგრამ ქართველ კაცს ღირსება არ დაუკარგავს და არც ახლა დაკარგავს.
ქართველი ხალხი არ აპატიებს სააკაშვილს და “ნაცხროვას” იმას, რა დღეში ჩაუგდეს ღირსება, ზნეობა, ნამუსი!…ამ ხროვამ საშვილიშვილოდ მოინდომა ხალხის თავმოყვარეობის გადაჯეგვა, მაგრამ ქართველი აღარ შეცდება, აღარასოდეს დაუშვებს გამრყვნელი, ცოცხების ხელისუფლების დაბრუნებას. ეს გამორიცხულია! საუკუნეების განმავლობაში არ დაგვიკარგავს ჩვენი ღირებულებები და “ნაცები” ვინ არიან, რომ დაგვაკარგვინონ!
რასაც ვამბობ, ამაში ღრმად ვარ დარწმუნებული. მთელი შვებულების პერიოდი ზუგდიდში გავატარე, მამაჩემის თანამოაზრეების გვერდით. როგორც ერთი საქართველოს მოქალაქე ხალხის განწყობას ვაკვირდებოდი და კარგად ვიცი, ნაცბანდაზე რასაც ფიქრობენ.
– არადა, “ნაციონალური მოძრაობა” ცდილობს, სამეგრელოს ამომრჩეველი ზვიად გამსახურდიას იდეების გამოყენებით მოხიბლოს! საპარლამენტო არჩევნებზე აქ ექსპრეზიდენტ სააკაშვილის მეუღლე სანდრა რულოვსი წარადგინეს, ადგილობრივ არჩევნებზე – ოპოზიციის ლიდერის, ნიკა მელიას მამა, ანზორ მელია…
– არაერთხელ მითქვამს და ახლაც გავიმეორებ, რომ შეწუხებული ვარ მამაჩემის, პრეზიდენტ ზვიად გამსახურდიას მომხრეთა მცირე ნაწილის შეცდომაში შეყვანით. რა თქმა უნდა, ყველას აქვს უფლება, საკუთარი პოლიტგემოვნება ჰქონდეს, მაგრამ ოპოზიციის იდეებს საერთო არაფერი აქვს ზვიად გამსახურდიას იდეებთან. ამიტომაც არ უწერია ასრულება ხელისუფლებაში მათი დაბრუნების უნიჭო მცდელობებს.
ხელისუფლებაში არ უნდა დაბრუნდნენ პოლიტიკური მეძავები და ყველაფრის მკადრებლები, შევარდნაძის ფრთის ქვეშ დაფრთიანებული ლეკვები. მე, ჩემ წილად, ამისთვის ყველაფერი გავაკეთე და მომავალშიც არაფერს დავიშურებ.
წყარო: კვირის პალიტრა