პირველ რიგში მინდა მივუსამძიმრო გარდაცვლილების ოჯახებს. ეს არის უმძიმესი ტრაგედია ამ ქალაქისთვის, ამ ქვეყნისთვის, პირადად ჩემთვის, – ამის შესახებ თორნიკე რიჟვაძემ განაცხადა. აჭარის მთავრობის მეთაურმა სამაშველო ოპერაციაში მონაწილე მაშველებს და შინაგან საქმეთა მინისტრს მადლობა გადაუხადა.
„ასევე მინდა დიდი მადლობა გადავუხადო თითოეულ მაშველს, რომელიც 2 დღის განმავლობაში თავგანწირვით ცდილობდა ადამიანების გადარჩენას. მადლობა მინდა გადავუხადო შინაგან საქმეთა მინისტრს, ბატონ ვახტანგ გომელაურს, რომელიც 2 დღეა აქ იმყოფება და პირადად ხელმძღვანელობდა მაშველებისა და შესაბამისი უწყებების კოორდინაციას. რაც შეეხება სხვა საკითხებს, როგორც ცნობილია გვყავს 9 დაღუპული, მაშველებმა მოახერხეს 2 ადამიანის გადარჩენა. მათი მდგომარეობა არის დამაკმაყოფილებელი. რაც შეეხება ამ შემზარავი ტრაგედიის მიზეზებს, ამ ყველაფერს გამოძიება გასცემს ობიექტურ და სრულ პასუხს“, – განაცხადა რიჟვაძემ.