ოპოზიციონერი დეპუტატის, „ნაციონალური მოძრაობის“ წევრის, თინა ბოკუჩავას განცხადებით, სტრასბურგის სასამართლომ დაადასტურა, რომ მიხეილ სააკაშვილის ნამდვილად შიმშილობს. ასე გამოეხმაურა ბოკუჩავა სტრასბურგის სასამართლოს გადაწყვეტილებას მიხეილ სააკაშვილის სამოქალაქო კლინიკაში გადაყვანის მოთხოვნის თაობაზე.
„ქართული ოცნების“ უბინძურესი პროპაგანდის მიუხედავად, სტრასბურგის სასამართლომ დაადასტურა, რომ მიხეილ სააკაშვილის ნამდვილად შიმშილობს. ჰუმანიტარული მიზნებიდან გამომდინარე სასამართლომ სთხოვა სააკაშვილს, შეეწყვიტა შიმშილობა. ბუნებრივია, ამასთან დაკავშირებით გადაწყვეტილებას თავად მიხეილ სააკაშვილი მიიღებს“, – აცხადებს ბოკუჩავა.
საქართველოს ყოფილი პრეზიდენტი, მიხეილ სააკაშვილი 1-ელ ოქტომბერს დააკავეს. პატიმრობაში მყოფმა სააკაშვილმა შიმშილობა გამოაცხადა. სააკაშვილის ადვოკატები და სახალხო დამცველი ყოფილი პრეზიდენტის სამოქალაქო საავადმყოფოში გადაყვანას ითხოვენ, იუსტიციის სამინისტრო კი აცხადებს, რომ #18 სასჯელაღსრულების (სამკურნალო) დაწესებულებაში სააკაშვილის მკურნალობისთვის ყველა აუცილებელი პირობა არსებობს.
6 ნოემბერს პენიტენციურმა სამსახურმა გაასაჯაროვა იმ პროდუქტების ამსახველი ფოტომასალა, რომლებითაც პატიმარი სააკაშვილი იკვებებოდა.
მიხეილ სააკაშვილი გლდანის მე-18 სამკურნალო დაწესებულებაში 8 ნოემბერს გადაიყვანეს.
სტრასბურგის სასამართლომ არ დააკმაყოფილა სააკაშვილის საჩივარი კერძო კლინიკაში გადაყვანასთან დაკავშირებით და შიმშილობის შეწყვეტა მოსთხოვა.