საქართველოს შეიარაღებული ძალების გენშტაბის უფროსის მოადგილის ვლადიმერ ჩაჩიბაიას თქმით, ავღანეთის ქალაქ მაზარ-ი-შარიფში მომხდარი თავდასხმის შედეგად ქართველი ჯარისკაცები არ დაშავებულან და ყველა მათგანი უვნებელია.
“ავღანეთის ჩრდილოეთის რეგიონის ქალაქ მაზარ -ი-შარიფში ანტისამთავრობო ძალების შეიარაღებულმა პირებმა მოახდინეს თავდასხმა, კომპლექსური შეტევა გერმანიის გენერალურ საკონსულოზე, რა დროსაც მოხდა მანქანის დეტონირება. ქართველებმა იმოქმედეს მყისიერად. ქართულმა ოცეულმა, რომელიც იმყოფებოდა სწრაფი რეაგირების ამოცანით, ადგილზე გასვლის შედეგად, მოიგერია ასევე მოწინააღმდეგის მხრიდან გახსნილი ცეცხლი. მოხდა დიპლომატიური კორპუსის პირადი შემადგენლობის უსაფრთხო ადგილზე ევაკუირება. ამის შემდგომ გერნიის საგარეო საქმეთა სამინისტრომ მადლობის წერილი გაავრცელა“,- აღნიშნა ჩაჩიბაიამ.
ჩაჩიბაიას ინფორმაციით, მომხდარის შედეგად დაიღუპა 6 და დაიჭრა 120 ადგილობრივი მოსახლე.
ავღანეთის ქალაქ მაზარ-ი-შარიფში გერმანიის გენერალურ საკონსულოზე მომხდარი შეიარაღებული თავდასხმის მოგერიებაში ავღანეთში „მტკიცე მხარდაჭერის მისიის“ მონაწილე ქართველმა სამხედროებმა მიიღეს მონაწილეობა.