დღეს შვედეთში ეუთოს მინისტერიალი იწყება, რომელშიც მონაწილეობს საქართველოს ვიცე პრემიერი, საგარეო საქმეთა მინისტრი.
„ეუთო და ეუთო-ს პლატფორმა არის ის ფორუმი, რომელსაც მაქსიმალურად ვიყენებთ საქართველოს საკითხების აქტუალიზაციისთვის და ეს არის ერთ-ერთი კარგი შესაძლებლობა, რათა თუნდაც ოკუპირებულ ტერიტორიებზე არსებულ მძიმე ჰუმანიტარულ სიტუაციასთან დაკავშირებით ვისაუბროთ“, – ამის შესახებ საქართველოს საგარეო საქმეთა მინისტრმა, დავით ზალკალიანმა განაცხადა, რომელიც დღეს სტოკჰოლმში, ეუთო-ს მინისტერიალის გახსნის სესიაზე სიტყვით გამოვა.
მისი თქმით, სიტყვით გამოსვლისას ყურადღებას გაამახვილებს ოკუპირებულ ტერიტორიებზე არსებულ ვითარებასა და დეოკუპაციის სტრატეგიაზე.
„ვისაუბრებთ ასევე უკანონო ბორდერიზაციაზე, უკანონო დაკავებებზე, ჟენევის პროცესზე და რა უნდა გაკეთდეს, რადგანაც ეს ორგანიზაცია ერთ-ერთი მნიშვნელოვანი აქტორია, როგორც თანათავმჯდომარე ჩართულია ჟენევის მოლაპარაკებების პროცესში. ამიტომ, ჩემი გამოსვლის ძირითადი აქცენტი იქნება სწორედ ამ მიმართულებებზე. ოკუპირებულ ტერიტორიებზე არსებულ სიტუაციაზე, ასევე ჟენევის მოლაპარაკებებზე, რა უნდა გაკეთდეს იმისთვის, რომ ის ძირითადი ფუნდამენტი, რაზეც არის დაფუძნებული ეს მოლაპარაკებები, იყოს შესრულებული და როგორ შეიძლება მთლიანად საერთაშორისო თანამეგობრობის კონსოლიდაცია. გარდა ამისა, ვისაუბრებ ჩვენს სამშვიდობო პოლიტიკაზე, დეოკუპაციის სტრატეგიაზე, რომელზეც ამჟამად ვმუშაობთ და მაქსიმალურად გამოვიყენებთ იმისთვის, რომ საქართველოს თემის აქტუალიზაცია იყოს ამ ფორმატში“, – განაცხადა ზალკალიანმა.
ზალკალიანს სტოკჰოლმში, ორმხრივი შეხვედრებიც აქვს დაგეგმილი.