ფონიჭალაში მომხდარი, დედა-შვილის განზრახ მკვლელობაში ბრალდებულ გიორგი ხაბეიშვილის მიმართ სასამართლომ აღმკვეთი ღონისძიების სახით პატიმრობა ძალაში დატოვა.
დაცვის მხარე ბრალდებულის 10 ათას ლარიანი გირაოს სანაცვლოდ განთავისუფლებას ითხოვდა. მოსამართლემ დაცვის მხარის ეს შუამდგომლობა არ დააკმაყოფილა და ბრალდებული პატიმრობაში დატოვა.
როგორც დღევანდელ სასამართლო პროცესზე გაირკვა, ფონიჭალაში დედა-შვილის განზრახ მკვლელობაში ბრალდებული გიორგი ხაბეიშვილის საქმე შესაძლოა ნაფიცი მსაჯულების მიერ იყოს განხილული, თუმცა ამაზე დაცვის მხარეს პოზიცია ჩამოყალიბებული აქვს და არ სურს, საქმე ნაფიცმა მსაჯულებმა განიხილოს.
ბრალდებული წარდგენილ ბრალდებას არ აღიარებს, რომლის თანახმადაც, მას გამოძიება ფინიჭალაში ნონა რამინაძისა და მისი მცირეწლოვანი შვილის მარიამ მამფორიას დამამძიმებელ გარემოებებში განზრახ მკვლელობას ედავება.
შემდეგი სასამართლო პროცესი 22 ნოემბერს გაიმართება.
ფონიჭალაში ნონა რამინაძე და მისი მცირეწლოვანი შვილი მარიამ მამფორია გარდაცვლილები 2016 წლის 22 თებერვალს იპოვეს. დედას ყელი ჰქონდა გამოჭრილი, ხოლო შვილი დამწვარი საწოლზე იპოვეს. სამართალდამცველებმა საქმე ივლისში გახსნეს და გიორგი ხაბეიშვილი დააკავეს.