ჯვრისწერა გარდაცვალების შემდეგ – ამირან გამყრელიძის მონათხრობ ამ ტრაგიკულ ისტორიას დიდი გამოხმაურება მოჰყვა. ცნობილი იყო, რომ მისი ვაჟი, გიგი 1995 წელს ავტოსაგზაო შემთხვევას ემსხვერპლა, თუმცა, ფართო საზოგადოებამ არ იცოდა, რომ ახალგაზრდა საცოლესთან ერთად დაიღუპა.
დოშა ტუღუშს და გიგის რამდენიმე კვირაში ქორწილი უნდა ჰქონოდათ, თუმცა, სამწუხაროდ, არ დასცალდათ.
23 წლის გიგის შესახებ „პრიმტაიმთან“ მისი თანამშრომელი, ცირა ბუბუტეიშვილი საუბრობს.
„მე და გიგი ერთად ვმუშაობდით აგრო ბანკში, მაშინ კადრების უფროსი ვიყავი. გიგი სალაროს ხელმძღვანელობდა. ახლაც მეტირება, რომ მახსენდება. შესანიშნავი პიროვნება იყო.
იუმორი ჰქონდა საოცარი, მე ზედა სართულზე ვიჯექ. რომ შემოდიოდა, ფეხის ნაბიჯებით ვცნობდი. სხვანაირი ნაბიჯებით შემოდიოდა, „ცირა ბებო სად არის, ნეტავ?“ – ამბობდა ხოლმე. მაშინ ბებია არ ვიყავი, ახალგაზრდა ვიყავი, მაგრამ ასე ხუმრობდა. ყავას ვასმევდი ხოლმე.
იყო კეთილშობილი, არისტოკრატული მანერები ჰქონდა. ფერი ჰქონდა სასწაული, კარგი შესახედი, კარგი გულის ბიჭი. თანამშრომლები ერთი ორი კვირა შოკირებულები, ჭკუაზე არ ვიყავით, ტირილი და ერთი ამბავი იყო. სამსახურში, კედელზე გიგის სურათი გვქონდა გაკრული“, – იხსენებს „პრაიმტაიმთან“ ცირა ბუბუტეიშვილი.